काठमान्डौं,३ । जेठ नेपाल प्रहरी अस्पतालमा साढे दुई वर्षदेखि एमआरआई मेसिन बिग्रिएर थन्किँदा सेवाग्राही समस्यामा परेका छन् ।
नेपाल प्रहरी र उहाँहरुको परिवारको उपचारका लागि सञ्चालन गरिएको अस्पतालमा एमआरआई सेवा बन्द हुँदा उपचारका लागि आउने बिरामी बाहिर जान बाध्य भएका छन् । साढे दुई वर्षदेखि बिग्रिएको मेसिन मर्मत नगर्दा उपचारका लागी आउने बिरामीले भने सास्ती खेप्नुपरेको बताएका छन् ।
करिब ८० हजार प्रहरी कर्मचारीले आफ्नै अस्पतालबाट उपचार गराउँदै आएकमा अहिले सेवा बन्द हुदा त्यहाँका कर्मचारी समेत प्राइभेटमा जानुपर्ने बाध्यता छ ।
मेसिन मर्मतमा चासो नदिँदा अस्पताल पुग्ने प्रहरी परिवार मात्र नभई आम सर्वसाधारणलाई समेत समस्या भएको छ भने बिरामीहरु एमआरआई गर्नकै लागि निजी अस्पताल धाउन र एमआरआई गराउन महँगो शुल्क तिर्नुपर्ने बाध्यता रहेको उनीहरूको गुनासो छ ।
मर्मतमा चासो नदिँदा सेवाग्राही अस्पतालप्रति असन्तुष्ट बन्दै गएका छन् । अस्पतालका कर्मचारीहरूले भने एमआरआई बाहिर गराएर आउन सुझाव दिने गरेका छन् । मेसिन कहिले बन्छ भन्ने प्रश्नमा त्यहाका कर्मचारीहरू सधै मौन रहने गरेका छन् ।
अस्पतालका प्रवक्ता रामेश्वर अधिकारीले मेसिन बिग्रिएको दुई वर्षभन्दा बढी भइसकेको बताउनु भएको छ । प्राविधिक कारणले मेसिन मर्मत हुन नसकेको उहाँको भनाइ रहेको छ । उहाँका अनुसार मेसिन मर्मतका लागि रकम विनियोजन नहुँदा समस्या भएको हो र मेसिन मर्मतमा कति खर्च लाग्छ भन्ने जानकारीसमेत आफुलाई नभएको उहाँको भनाइ छ । र सरकारले बजेट विनियोजन गरेपछि मात्रै मर्मत सम्भव हुने उहाँ बताउनु हुन्छ ।
नेपाल प्रहरीका केन्द्रीय प्रवक्ता भन्नुहुन्छ मेसिन मर्मत गर्न धेरै खर्च लाग्ने भएकाले नयाँ मेसिन खरिद गर्नु उपयुक्त हुने देखिएको छ ।
‘मर्मतमा पनि धेरै खर्च लाग्छ । त्यसैले नयाँ मेसिन किन्ने प्रक्रियामा जाने तयारी छ,’ उहाँको भनाइ थियो ।
