काठमाडौं,५ जेठ। सांसद नीता घतानीले दलित समुदाय माथि भइरहेको विभेद र बहिष्कार अन्त्य गर्न सरकारको ध्यानाकर्षण गराउनु भएको छ । मंगलबार प्रतिनिधिसभामा बोल्दै उहाँले माइतीघर मण्डलामा दिपा नेपाली ३१ दिनदेखि सत्याग्रह बसिरहेको उल्लेख गर्दै यो केवल कोठाको विषय मात्र नभई दलित समुदायमाथि वर्षौंदेखि थुपारिँदै आएको निषेध, विभेद र बहिस्कार माथि उठेको समाजको यथार्थ रहेको बताउनु भयो ।
उहाँले भन्नु भयो, ‘दिपा नेपाली माइतीघर मण्डलामा सत्याग्रह वा धर्ना बसेको आज ३१ दिन हुँदैछ । यो कोठको विषय मात्र होइन यो दलित समुदायमाथि वषौंदेखि थुपारिँदै आएको निषेध, विभेद र बहिस्कार हो ।’ उहाँले राज्यमा दलित समुदायका लागि अवसर, सम्मान र पहुँच अझै खाली रहेको यथार्थ प्रश्न रहेको बताउनु भयो।
‘राज्यमा दलित समुदायको लागि अवसर, सम्मान र समान पहुँच अझै छैन् । हामीले संविधानमा समानता, सामाजिक न्याय, दलितको हकको विषय राख्यौ छुवाछुत राष्ट्रमुक्त घोषणा पनि गर्यौं तर व्यवहारमा अझै फरक देखिन्छ,’ उहाँले भन्नु भयो। उहाँले नेपाललाई छुवाछुतमुक्त राष्ट्र घोषणा गरिए पनि समाजमा अझै फरक व्यवहार नदेखिएको बताउनु भयो ।
