रामेछाप,६ जेठ । रामेछापको दुर्गम गाउँ उमाकुण्ड गाउँपालिका–२ बाम्तीमा आधारभूत अस्पतालको भवन बनेको भए पनि अस्पताल स्विकृत नहुँदा सञ्चालनमा आउन सकेको छैन । केपी ओली प्रधानमन्त्री भएको बेला देश भरका स्थानीय तहमा कम्तीमा एउटा आधारभूत अस्पताल निर्माण गर्ने योजना अनुसार यो अस्पतालको भवन निर्माण भएको थियो । संघीय सरकारको बजेटबाट अस्पताल भवन निर्माण भए पनि अस्पताल र दरबन्दी विकृत नहुँदा अस्पताल सञ्चालनमा आउन नसकेको वडाध्यक्ष खम्बध्वज बस्नेतले बताउनु भयो।
एक पालिका एक अस्पताल कार्यक्रम अन्तर्गत सो अस्पताल निर्माण गरिएको उहाँले जानकारी दिनु भयो । यस अघि स्वास्थ्य चौकी रहेको स्थानमा नै जग्गा खरिद गरी अस्पताल भवन बनाइएको उहाँले बताउनु भयो । वडा र गाउँपालिकाबाट गर्ने प्रक्रिया गरिहरेको उहाँले जानकारी दिनु भयो । स्वास्थ्य चौकीको सट्टा छिटोभन्दा छिटो अस्पताल सञ्चालन होस् भन्ने आफ्नो चाहना रहेको उहाँको भनाइ छ । आधारभूत अस्पताल सञ्चालनको लागि आफूले प्रयास गरिरहेको बताउँदै गाउँपालिका अध्यक्ष शेरबहादुर सुनुवारले केन्द्र सरकारबाट स्वीकृति नआएको कारण गाउँपालिकाले समेत डाक्टर राखेर सेवा चलाइरहेको जानकारी दिनु भयो । डाक्टर बस्ने वातावरण बनाउन स्थानीयलाई पनि उहाँले आग्रह गर्नु भयो ।
दुर्गम गाउँको अस्पताल सञ्चालन नहुँदा स्थानीयले उपचार नपाएर मर्नुपर्ने अवस्था आएको भन्दै स्थानीयले अस्पताल चलाउने वातावरण बनाइदिन वाग्मती प्रदेशका स्वास्थ्य मन्त्री किरण थापासँग अनुरोध गर्नु भयो। स्वास्थ्य मन्त्री किरण थापा मगरले आधारभूत अस्पताल बनेपछि संघीय सरकारले २ जना मेडिकल अधिकृत सहित स्वास्थ्यकर्मी पठाउने र त्यसमा प्रदेश सरकारले समेत सहयोग गर्ने बताउनु भयो । उहाँले सबैभन्दा पहिला अस्पताल सञ्चालनको स्वीकृति लिने प्रक्रिया अघि बढाउन आग्रह गर्नु भयो । यसको लागि स्थानीय तह, प्रदेशका सांसद र नागरिकको भूमिका आवश्यक रहेको उहाँले बताउनु भयो ।
अस्पताल स्वीकृत नहुँदा अस्पतालको लागि बनेको विशाल भवन प्रयोग विहीन भएको छ । अहिले पनि स्वास्थ्य चौकीको भवनबाट आधारभूत स्वास्थ्य सेवा मात्र प्रवाह हुने गरेको छ । बिरामी पर्दा हेलिकप्टर रिजर्भ गरेर काठमाडौं जानु पर्ने बाध्यता स्थानीयको रहेको छ ।
