काठमाडौं,१४ जेठ । अमेरिकाका सामाजसेवी तथा फोटो पत्रकार स्कट म्याकलेननको निधन भएको छ । क्यान्सर रोगसँग लामो समयदेखि लडिरहनु भएको उहाँको बुधबार निधन भएको हो । सन् २००६ तिर पहिलोपटक पर्यटकका रूपमा नेपाल आँउनु भएका स्कट यहाँका ग्रामीण भेगका मानिसहरूको गरिबी, स्वास्थ्य क्षेत्रको दयनीय अवस्था र खासगरी महिलाहरूको संघर्ष देखेपछि निकै प्रभावित हुनु भएको थियो। त्यसपछि उहाँले नेपालका दुर्गम क्षेत्रमा स्वास्थ्य र शिक्षाको पहुँच पु¥याउने उद्देश्यले ‘द माउन्टेन फन्ड’ नामक गैरसरकारी संस्थाको स्थापना गर्नु भयो।
उक्त संस्था मार्फत उहाँले ओखलढुङ्गा, सिन्धुपाल्चोक लगायतका जिल्लाहरूमा स्वास्थ्य शिविर सञ्चालन, औषधि वितरण र स्वास्थ्य चौकीहरू निर्माण गर्ने कार्यमा ठूलो योगदान पु¥याउनु भएको थियो। ०७२ सालको विनाशकारी भूकम्पको समयमा स्कट र उहाँको टोलीले धादिङ र सिन्धुपाल्चोकका दुर्गम गाउँहरूमा पुगेर उद्धार तथा राहत सामग्री वितरणमा काम गरेको थियो। घरबारविहीन भएका सयौँ परिवारका लागि अस्थायी आवास निर्माण र घाइतेहरूको उपचारमा उहाँले सहयोग गर्नु भयो। एक कुशल फोटोग्राफरका रूपमा स्कटले नेपालका हिमाल, संस्कृति र विशेष गरी नेपालीहरूको जीवनका अनेकौँ आयामहरूलाई तस्बिरमार्फत विश्वभर चिनाउने काम गर्नु भयो।
अन्तर्राष्ट्रिय मञ्चहरूमा उहाँले खिचेका तस्बिरहरू प्रदर्शन गरेर नेपालको पर्यटन र यहाँका सामाजिक मुद्दाहरूमा विश्वको ध्यान आकर्षित गराउँदै आउनु भएको थियो । उहाँलाई नेपाल र नेपालीहरूलाई आत्मादेखि माया गर्ने सच्चा अमेरिकी समाजसेवीका रुपमा चिन्ने गरिन्छ । भौगोलिक रूपमा अमेरिकी नागरिक भए पनि उहाँको मन र कर्म सधैँ नेपाली माटोमै समर्पित रहेको उहाँ निकट शुभेच्छुकहरुको भनाइ छ । बिहीबार स्कटको सेलिब्रेशन अफ लाइफ स्मारक सेवा कार्यक्रम गरिँदै छ । उहाँकी श्रीमती सुनिता सुवेदी शर्मा (म्याकलेनन)ले स्कटको फेसबुकमा स्टाटस लेख्दै बिहीबार दिउँसो १ बजे स्कटको सेलिब्रेशन अफ लाइफ स्मारक सेवा कार्यक्रम गर्न लागेको जानकारी दिइनु भएको थियो।
उहाँले स्कटको बिदाइ र स्वर्गीय यात्राको सुरुवातको लागि श्रद्धाञ्जली व्यक्त समेत गर्नु भएको थियो।
स्कटका साथी तथा आफन्तहरुले पनि सामाजिक सञ्जालमा श्रद्धाञ्जली अर्पण गरिरहनु भएको छ।
