काठमाडौँ,१८ जेठ । नेपाल चेम्बर अफ कमर्शका अध्यक्ष कमलेशकुमार अग्रवालले आगामी आर्थिक वर्षको बजेटले लामो समयदेखि सुस्त रहेको अर्थतन्त्रलाई चलायमान बनाउने विश्वास व्यक्त गर्नु भएको छ।
सोमबार नेपाल आर्थिक पत्रकार संघ (नाफिज)ले आयोजना गरेको बजेटसम्बन्धी अन्तरक्रिया कार्यक्रममा बोल्दै अध्यक्ष अग्रवालले कर सुधारका क्षेत्रमा बजेटले उल्लेखनीय प्रगति गरेको बताउनु भयो। उहाँका अनुसार लामो समयदेखि रोकिएका कर सुधारका विषयलाई बजेटमार्फत सम्बोधन गरिएको छ।
उहाँले भन्नु भयो,‘लामो समयदेखिको सिथिल अर्थतन्त्रलाई चलायमान बनाउने छ । मुलुकको अर्थतन्त्रलाई नयाँ आयाम दिँदै आर्थिक समृद्धिको नयाँ युगमा प्रवेश गर्ने सुरुवात बिन्दुको रुपमा यो प्रस्तुत गरिएको देखिन्छ । कर सुधारका विषयमा लामो समयदेखि रोकिएका थिए । बजेटले, यसपटकको कर सुधारमा ठूलो फड्को मारेको छ । व्यक्तिगत आयकरमा ठूलो राहत दिइएको छ । वार्षिक १० लाखसम्मको आम्दानी हुनेलाई, यो कैयौं वर्षदेखि ५ लाख र ६ लाखको दायरामा यो कर छुट दिएर हामी अल्झिएका थियौं। त्यसले पारदर्शी अर्थतन्त्र सुरुवात हुन सकेन। यसपटक हाम्रो मागले, सुरुवात १० लाखबाट गरौं भन्ने थियो, जुन कुरा हो, माननीय मन्त्री ज्यूले बजेटमा रिफ्लेक्ट गर्नुभएको छ।’
अध्यक्ष अग्रवालले बहुदर मूल्य अभिवृद्धि कर (भ्याट) प्रणाली कार्यान्वयनतर्फ सरकारले अघि बढाएको कदमलाई साहसिक निर्णयको संज्ञा दिनु भयो ।
यद्यपि, विद्युत् महसुलमा ५ प्रतिशत भ्याट लगाइएको विषयमा भन्नु भयो उहाँले असन्तुष्टि व्यक्त गर्नुभयो ।
उहाँले भन्नु भयो, ‘सरकले बिजुली र राइड सेयरिङमा ५ प्रतिशतको मूल्य अभिवृद्धि कर लगाउँदै बहुदर भ्याटको व्यवस्था सुरुवात भएको छ । नेपाल जलस्रोतको प्रचुर सम्भावना भएको देश हो, यसको उत्पादन बढाउँदै लानुपर्नेमा करको कुरा नमिलेजस्तो लाग्यो । भ्याटमा बहुदरको सान्दर्भिकताबारे पनि अध्ययन गरी सुधार पेश गर्न, एउटा उच्चस्तरीय समितिको गठन गर्न जरुरी छ ।’ उहाँले आवश्यक कानुनी परिमार्जन भएमा पुँजीगत लाभकरबारे देखिएका अन्योल र भ्रम स्वतः हट्ने विश्वास व्यक्त गर्नु भयो।
