दमक, २० जेठ। भारतका प्रधानमन्त्री नरेन्द्र मोदीले नेपाललाई भारतको ‘नेबरहुड फर्स्ट’ (छिमेकी पहिलो) नीतिअन्तर्गतको प्राथमिक साझेदार राष्ट्र भएको बताउनु भएको छ। उहाले नेपालसँगको विशेष र बहुआयामिक सम्बन्धलाई अझ नयाँ उचाइमा पुर्याउन भारत प्रतिबद्ध रहेको समेत स्पष्ट पार्नुभयो ।
भारत भ्रमणमा रहनुभएका राष्ट्रिय स्वतन्त्र पार्टी (रास्वपा) का सभापति रवि लामिछानेसँगको भेटपछि सामाजिक सञ्जाल फेसबुकमार्फत प्रतिक्रिया दिँदै मोदीले नेपाललाई भारतको विदेश नीतिमा विशेष महत्व दिइएको उल्लेख गर्नुभयो ।
उहाले नयाँ सरकारसँग सहकार्य गरेर दुई देशबीचको सम्बन्धलाई अझ मजबुत बनाउने इच्छा रहेको समेत स्पस्ट पार्नुभएको छ ।
नेपाल र भारतबीचको सम्बन्ध केवल छिमेकी राष्ट्रबीचको सम्बन्ध मात्र नभई बहुआयामिक र विशेष प्रकृतिको रहेको भन्दै भारतीय प्रधानमन्त्री मोदीले भन्नुभयो “साझा समृद्धि र उज्ज्वल भविष्यका लागि मिलेर काम गर्ने छौ । नेपालको चाहनालाई आफूले स्वागत गर्ने र त्यसमा पूर्ण सहमति रहेको पनि छु ।
मोदीको यो अभिव्यक्तिलाई नेपालप्रति भारतले आफ्नो ‘नेबरहुड फर्स्ट’ नीतिलाई निरन्तरता दिएको सन्देशका रूपमा हेरिएको छ। साथै, नेपालमा नयाँ राजनीतिक समीकरण बनेपछि भारतले सम्बन्धलाई अझ सुदृढ बनाउन चाहेको संकेतका रूपमा पनि विश्लेषण गरिएको छ।
भारत भ्रमणमा रहेका लामिछाने र मोदीबीचको भेटलाई दुई देशबीचको राजनीतिक तथा कूटनीतिक सम्बन्धका दृष्टिले अर्थपूर्ण मानिएको छ। भेटपछि सार्वजनिक भएको मोदीको सन्देशले नेपाललाई भारतको प्राथमिकतामा राखिएको विषयलाई पुनः स्पष्ट पारेको छ।
