काठमाडौं, २० जेठ । काठमाडौंको मनमैजु र टोखा क्षेत्रबाट प्रहरीले दुर्लभ वन्यजन्तु हात्तीको चार थान दाह्रा र लागुऔषधसहित ५ जनालाई पक्राउ गरेको छ। पक्राउ परेका दाह्राहरू गत भदौ २४ गते जेनजी आन्दोलनको क्रममा राष्ट्रपति कार्यालयको भित्ताबाट चोरी भएका हुन्।
काठमाडौं उपत्यका अपराध अनुसन्धान कार्यालयका एसपी शरतकुमार क्षेत्रीका अनुसार विशेष सूचनाका आधारमा प्रहरीले टोली परिचालन गरी उनीहरूलाई नियन्त्रणमा लिएको हो।
पक्राउ पर्नेहरूमा मुख्य आरोपी तारकेश्वर नगरपालिका–९, मनमैजुका राजीव महर्जन, टेकप्रसाद गुरुङ,पुरन बोहरा,आयुष महर्जन र सन्तबहादुर भुजेल रहेका छन् ।
तारकेश्वर–९ मनमैजु बस्ने राजीव महर्जनले वन्यजन्तुको अङ्ग अवैध रूपमा सञ्चय र बिक्री गरिरहेको सूचना पाएपछि प्रहरीले उनको निवासमा छापा मारेको थियो। अनुसन्धानका क्रममा महर्जनको घर नजिकैको खाली जग्गामा गाडेर राखिएको अवस्थामा २ थान हात्तीको दाह्रा बरामद भएको छ। साथै, उनको कोठा खानतलासी गर्दा प्रतिबन्धित लागुऔषध ‘लेखिएको १५० क्याप्सुल समेत फेला परेको प्रहरीले जनाएको छ।
महर्जनको बयान र अनुसन्धानको कडी जोड्दै जाँदा अन्य व्यक्तिको समेत संलग्नता खुलेपछि प्रहरीले टोखा क्षेत्रबाट थप आरोपीहरूलाई पक्राउ गरेको हो। जसमध्ये सन्तबहादुर भुजेलको कोठामा झोलाभित्र लुकाएर राखिएको अवस्थामा थप २ थान हात्तीको दाह्रा फेला परेको छ।
प््रहरीका अनुसार घटनाको संवेदनशीलता र थप तथ्यहरू संकलन भइरहेका कारण अहिल्यै औपचारिक रूपमा सबै विवरण सार्वजनिक गर्ने अवस्था छैन। तर, चोरी भएका यी सामग्री राष्ट्रपति कार्यालयकै हुन् भन्ने बलियो स्रोतको दाबी छ।
