काभ्रेपलाञ्चोक,२० जेठ। करिब एक महिनादेखि सम्पर्कविहीन रहेका सशस्त्र प्रहरी बलका एक असई र एक युवती काभ्रेपलाञ्चोकको पाँचखालस्थित सामुदायिक वनमा झुण्डिएको अवस्थामा मृत फेला परेका छन्।
जिल्ला प्रहरी कार्यालय काभ्रेपलाञ्चोकका अनुसार पर्साको बहुदरमाई–८ रामनगरीका सशस्त्र प्रहरी सहायक निरीक्षक ९असई० शक्ति राम र कैलालीको घोडाघोडी नगरपालिका–१ की २६ वर्षीया शर्मिला चौधरीको शव पाँचखाल नगरपालिका–३ स्थित ठूली सामुदायिक वनमा मौवाको रुखमा छुट्टाछुट्टै पासो लगाएको अवस्थामा भेटिएको हो।
प्रहरीका अनुसार शव अत्यधिक सडिसकेको अवस्थामा फेला परेकाले घटना केही दिनअघि नै भएको अनुमान गरिएको छ। वन क्षेत्रमा अनुगमनका क्रममा वन समितिका प्रतिनिधिले शव देखेपछि प्रहरीलाई जानकारी गराएका थिए।
प्रारम्भिक अनुसन्धानमा शर्मिला वैशाख १८ गते शक्ति रामलाई भेट्न काभ्रेपलाञ्चोक गएको र त्यसपछि दुवै सम्पर्कविहीन भएको खुलेको छ। उनीहरू हराएपछि दुवै परिवारले सम्बन्धित निकायमा खोजतलासका लागि निवेदन दिएका थिए।
प्रहरीले घटनास्थलबाट प्राप्त कपडा तथा अन्य कागजातका आधारमा मृतकहरूको पहिचान पुष्टि गरेको जनाएको छ। दुवै शव पोस्टमार्टमका लागि धुलिखेल अस्पतालमा राखिएको छ भने घटनाबारे थप अनुसन्धान जारी रहेको प्रहरीले जनाएको छ।
पछिल्लो समय महिलामाथि हुने हिंसा, रहस्यमय मृत्यु र बेपत्ता हुने घटनाहरू लगातार सार्वजनिक भइरहेका छन्। यस्ता घटनाले राज्यको सुरक्षा संयन्त्र, समाजको संवेदनशीलता र नागरिकको सुरक्षाप्रतिको विश्वासमाथि गम्भीर प्रश्न खडा गरिरहेको छ। सत्यतथ्य बाहिर ल्याई दोषीमाथि कानुनी कारबाही सुनिश्चित गर्नु राज्यको प्रमुख दायित्व हो भन्ने आवाज झन् बलियो बन्दै गएको छ।
