सोलुखुम्बु,२१ जेठ । सगरमाथा क्षेत्रमा हराएका ओखलढुंगाको खिजिदेम्बा गाउँपालिकाका दावा शेर्पा जीवितै फेला पर्नु भएको छ। सगरमाथाको तेस्रो शिविर (क्याम्प–३) आसपासबाट बेपत्ता भएका शेर्पालाई बिहीबार बिहान खुम्बु आइसफलस्थित क्र्याम्पन पोइन्ट नजिक आधारशिविरतर्फ ओर्लिरहेको अवस्थामा उद्धार गरिएको हो । सगरमाथा प्रदूषण नियन्त्रण समितिका कर्मचारीहरूले उहाँलाई अत्यन्त कमजोर अवस्थामा देखेपछि तत्काल उद्धार गरी आधारशिविर तर्फ ल्याएका हुन् । प्रारम्भिक जानकारीअनुसार उहाँ लामो समयदेखि सम्पर्कविहीन हुनुन्थ्यो र उहाँको खोजी कार्य जारी रहेको थियो ।
उच्च हिमाली क्षेत्रमा बेपत्ता भएका व्यक्तिहरू जीवितै भेटिनु दुर्लभ मानिन्छ । विशेषगरी क्याम्प–३ क्षेत्र सगरमाथा आरोहण मार्गको अत्यन्त जोखिमपूर्ण खण्डमध्ये एक हो । समुद्री सतहबाट करिब ७,२०० मिटर उचाइमा रहेको यस क्षेत्रमा अक्सिजनको मात्रा निकै कम हुने, तापक्रम अत्यधिक न्यून रहने तथा मौसम एकाएक परिवर्तन हुने भएकाले आरोहीहरू उच्च जोखिममा रहने गर्छन् । दावा शेर्पा जीवितै फेला परेको खबर सार्वजनिक भएसँगै उहाँका परिवार, आफन्त तथा पर्वतारोहण क्षेत्रमा आबद्ध व्यक्तिहरूले राहतको महसुस गरेका छन् ।
उहाँको अवस्थाबारे विभिन्न आशंका व्यक्त भइरहेका बेला जीवितै फेला पर्नु सुखद समाचारका रूपमा लिइएको छ । उद्धारपछि उहाँको स्वास्थ्य अवस्था परीक्षणको व्यवस्था गरिएको छ । अत्यधिक थकान, चिसो र लामो समयको शारीरिक संघर्षका कारण उहाँ कमजोर देखिए पनि बोल्न सक्ने अवस्थामा रहेको प्रारम्भिक जानकारी प्राप्त भएको छ । स्वास्थ्यकर्मीको निगरानीमा राखेर थप उपचार गरिने भएको छ ।
सगरमाथा क्षेत्रमा हरेक वर्ष सयौं स्वदेशी तथा विदेशी पर्वतारोही पुग्ने गर्छन् । तर प्रतिकूल मौसम, हिमपहिरो, अक्सिजनको कमी तथा शारीरिक समस्याका कारण बेला–बेलामा दुर्घटना र बेपत्ता हुने घटना पनि हुने गरेका छन् । यस्ता घटनाबीच दावा शेर्पाको जीवित उद्धारलाई पर्वतारोहण समुदायले आश्चर्यजनक र प्रेरणादायी घटनाका रूपमा लिएको छ ।
खोज तथा उद्धारमा संलग्न टोलीका अनुसार उहाँलाई फेला पारिएको स्थान आधारशिविरभन्दा माथि भएपनि उहाँ आफैं आधारशिविरतर्फ ओर्लने प्रयास गरिरहनु भएको थियो। दावा शेर्पाको जीवित उद्धारसँगै सगरमाथा क्षेत्रमा जारी खोज तथा उद्धार अभियानले अर्को सफल परिणाम हासिल गरेको छ । स्थानीयवासी, पर्यटन व्यवसायी तथा पर्वतारोहण क्षेत्रका सरोकारवालाले उहाँको शीघ्र स्वास्थ्य लाभको कामना गरेका छन् ।
