सर्लाही,२१ जेठ। सर्लाहीको हरकठवा स्थित इलाका प्रहरी कार्यालयमा सोधपुछका लागि बोलाइएका एक व्यक्ति माथि प्रहरी जवानले निर्घात कुटपिट गरेको बाहिरिएको छ। कुटपिटबाट धनकौल गाउँपालिका – ५ हरक ठवाका फेकु दास गम्भीर घाइते हुनु भएको छ। दासका अनुसार उहाँ बुधबार दिउँसो श्रीमती सहित इलाका प्रहरी कार्यालय हरकठवा पुग्नु भएको थियो। उहाँका दुई छोराले अध्ययन गरेको साइनिङ स्टार बोर्डिङ स्कुलको १३ हजार रुपैयाँ शुल्क बाँकी रहेको भन्दै विद्यालय सञ्चालक संजय साहले जिल्ला प्रशासन कार्यालय सर्लाहीमा निवेदन दिनु भएको थियो।
सोही निवेदनका विषयमा बुझ्न प्रशासनले प्रहरी कार्यालयलाई पत्राचार गरेपछि आफूलाई बोलाइएको उहाँले बताउनु भयो । प्रहरी कार्यालय पुगेपछि आफूलाई एउटा कागजातमा हस्ताक्षर गर्न भनिएको तर विद्यालयको सम्पूर्ण शुल्क बुझाइसकेको भन्दै हस्ताक्षर गर्न नमानेपछि प्रहरी जवान रामजीवन पासवानले कार्यालयभित्रको एक कोठामा लगेर कुटपिट गरेको दासको आरोप छ । कुटपिटबाट दासको बायाँ हात, तिघ्रा र पिठ्युँमा चोट लागेको छ । उहाँलाई उपचारका लागि बरहथवा स्थित हनुमन्त अस्पताल लगिएको थियो । त्यहाँ प्राथमिक उपचार पछि थप उपचारका लागि काठमाडौंस्थित ट्रमा सेन्टर रेफर गरिएको बताईएको छ ।
इलाका प्रहरी कार्यालय हरकठवाका प्रमुख प्रहरी नायब निरीक्षक (सई) पदम खड्काले कार्यालयभित्र दास र प्रहरी जवान पासवानबीच विवाद भएको स्वीकार गर्नु भएको छ। ‘उहाँहरूबीच विवाद भएको हो । त्यसक्रममा कुटपिट भएको हो,’ उहाँले भन्नु भयो। जिल्ला प्रहरी कार्यालय सर्लाहीका प्रहरी उपरीक्षक (एसपी) रबिन्द्रनाथ पौडेलले घटनाबारे जानकारी प्राप्त भएको र छानबिन सुरु गरिएको बताउनु भयो। उहाँका अनुसार प्रारम्भिक जानकारी अनुसार दासले मदिरा सेवन गरेर प्रहरीमाथि हातपात गर्न खोजेपछि विवाद भएको बुझिएको छ।
