दमक, २४ जेठ । झापाको दमक नगरपालिका–३ को वडा कार्यालयमा आगजनी, तोडफोड तथा लुटपाटको प्रयास गरेको आरोपमा पक्राउ परेका एक युवकलाई जिल्ला अदालत झापाले पुर्पक्षका लागि कारागार पठाउने आदेश दिएको छ।
गत वैशाख ९ गते बिहान वडा कार्यालयभित्र प्रवेश गरी कार्यालयका सामग्री तोडफोड गर्ने, महत्वपूर्ण सरकारी कागजातमा आगो लगाउने तथा कार्यालयको सम्पत्तिमा क्षति पु¥याउने आरोपमा पक्राउ परेका दमक–३ स्थित भुटानी शरणार्थी शिविरका बासिन्दा रबिन गुरुङलाई अदालतले अनुसन्धान अवधिभर थुनामा राख्न आदेश दिएको हो।
अदालतको आदेशअनुसार गुरुङलाई थप अनुसन्धानका लागि भद्रपुर कारागार पठाइएको छ। अदालतले जाहेरी, घटनासँग सम्बन्धित प्रमाण, अभियुक्तको बयान तथा मिसिलमा संलग्न अन्य कागजातको अध्ययनपछि उक्त आदेश दिएको जनाएको छ।
अदालतको आदेशमा गुरुङले घटनामा आफ्नो संलग्नता स्वीकार गरेको उल्लेख छ। बयानका क्रममा उनले मादक पदार्थ सेवन गरेको अवस्थामा घटना भएको भन्दै आफ्नो गल्ती स्वीकार गरेका छन्।
दमक नगरपालिकाले गुरुङविरुद्ध जिल्ला अदालत झापामा मुद्दा दर्ता गराएको थियो। नगरपालिकाले पेश गरेको दाबीअनुसार गुरुङले वडा कार्यालयमा रहेका करिब ७० हजार रुपैयाँ मूल्यका कम्प्युटर तथा २० हजार रुपैयाँ मूल्य बराबरको स्टिल दराजमा क्षति पु¥याएका थिए। साथै, कार्यालयमा सुरक्षित राखिएका महत्वपूर्ण सरकारी कागजातहरूमा आगो लगाई नष्ट गरेको आरोप पनि उनीमाथि छ।
घटनाको पुष्टि हुने सीसीटीभी फुटेज, क्षतिको विवरण तथा अन्य प्रमाण अदालतमा पेश गरिएको थियो। ती प्रमाणका आधारमा अदालतले घटनाको थप अनुसन्धान आवश्यक रहेको निष्कर्ष निकाल्दै गुरुङलाई पुर्पक्षका लागि थुनामा राख्ने आदेश दिएको हो।
