काठमाडौं,५ असार । राष्ट्रिय स्वतन्त्र पार्टी(रास्वपा)की सासद इन्दिरा राना मगरले वर्तमान सरकारले सार्वजनिक गरेको बजेटले स्थानीय तह तथा जिल्लाबीचको पूर्वाधार विकासलाई प्राथमिकता दिएको बताउनु भएको छ । शुक्रबार बसेको प्रतिनिधिसभा बैठकमा बोल्दै उहाँले एक जिल्लाबाट अर्को जिल्ला र एक पालिकाबाट अर्को पालिकालाई जोड्ने पुल निर्माण गर्नु विकास भएको बताउनु भएको छ।
उहाँले भन्नु भयो,‘वर्तमान सरकारले सार्वजनिक गरेको बजेटले एक जिल्लाबाट अर्को जिल्लामा जोड्ने, एउटा पालिकाबाट अर्को पालिका जोड्ने एकदमै सिर्जनात्मक तरीकाले निर्णय गरेको छ । यसलाई म समर्थन गर्न चाहन्छु । पहिला त्यस्तो थिएन । एउटा पालिकाबाट आर्को पालिकामा जोड्ने पुल निर्माण गर्नु भनेको विकास हो । त्यो पनि एउटा समृद्धि हो ।’
उहाँले भौतिक पूर्वाधारसँगै शिक्षामा लगानीको महत्व औँल्याउँदै बालबालिका माथिको लगानी दीर्घकालीन राष्ट्र निर्माणको आधार हुने बताउनु भयो । विद्यालयहरूमा शिक्षक दरबन्दीको समस्या अझै कायम रहेको बताउदै उहाँले करारमा कार्यरत शिक्षकहरू न्यून तलबमा काम गर्न बाध्य भएको बताउनु भयो । पाँच सय विद्यार्थी अध्ययनरत विद्यालयमा सीमित शिक्षक दरबन्दी हुँदा गुणस्तरीय शिक्षा प्रदान गर्न कठिन हुने बताउनु भयो ।
उहाँले भन्नु भयो, ‘हामी ठूला भवनका लागि लगानी गर्छौ, तर लगानी बालबालिकाको लागि गर्दनौं । हरेक विद्यालयमा एउटा दरबन्दी छ । करारमा बसेकाहरू १५ हजार २० हजारमा तलब खाएर बसेका छन् । ५ सय जना विद्यार्थी भएको ठाउँमा २३ जना दरबन्दी छ भने कसरी पाँच सय जना विद्यार्थीलाई राम्रो शिक्षा दिन सक्छौँ । त्यसैले विद्यालयमा हामीले लगानी गर्नु पर्दछ । ’
