विर्तामोड, ६ असार । नेपाल यातायात स्वतन्त्र मजदुर संगठनको ४७ औं स्थापना दिवसको सप्ताहब्यापी कार्यक्रमअन्तर्गत झापा जिल्ला कमिटीले आज रक्तदान कार्यक्रम गरेको छ ।
सडक दुर्घटनामा घाइते भएकाहरुले अकालमा ज्यान गुमाउनु नपरोस् भन्ने उद्देश्यले सो संगठनले हरेक वर्षको स्थापना दिवसमा यसैगरी रगत संकलन गर्दै आएको छ । स्थापना दिवसको पूर्वसन्ध्यामा चारआलीस्थित पाउ पाथिभरा मन्दिर परिसरमा आज आयोजित कार्यक्रममा १ सय ५ जनाले रक्तदान गरेका थिए ।
जिल्ला कमिटी अध्यक्ष छत्रबहादुर रायमाझीको अध्यक्षतामा भएको उक्त कार्यक्रममा केन्द्रीय उपमहासचिव देबीप्रसाद भट्टराई प्रमुख अतिथिका रुपमा उपस्थित हुनुहुन्थ्यो ।
