काठमाडौं,९ असार । राष्ट्रिय स्वतन्त्र पार्टीका सांसद एवं प्रवक्ता मनिष झाले बन्दसत्र एक दिन थपिन सक्ने बताउनु भएको छ । मंगलबार रास्वपाको प्रथम महाधिवेशन अन्तर्गत बन्दसत्र केही ढिलागरी सुरु भएपछि झाले महाधिवेशनमा व्यवस्थापकीय तथा प्राविधिक चुनौती देखिएको बताउनु भएको छ । चितवनको भरतपुरमा जारी महाधिवेशनका कार्यक्रम तालिकाभन्दा ढिलो अघि बढेपछी प्रवक्ता झाले बन्दसत्र सञ्चालनमा ढिलाइ भएको स्वीकार गर्दै व्यवस्थापनका कारण महाधिवेशन एक दिन थपिन सक्ने संकेत गर्नु भएको छ।
उहाँका अनुसार प्रतिनिधि दर्ता, नामावली व्यवस्थापन र किट वितरणजस्ता प्राविधिक तयारी समयमै पूरा नहुँदा बन्दसत्र ढिलो सुरु भएको हो। उहाँले सबै प्रक्रिया पूरा गरेर आजैदेखि बन्दसत्र अघि बढाइएको बताउनु भयो। झाले भन्नु भयो, ‘प्रतिनिधि संख्या अपेक्षाभन्दा बढी भएकाले व्यवस्थापन चुनौतीपूर्ण बनेको छ। करिब पाँच सयभन्दा बढी प्रतिनिधि थपिएपछि नामावली अद्यावधिक, दाबी–विरोध प्रक्रिया र सामग्री व्यवस्थापनमा समय लागेको हो।’ उहाँले संगठन निर्माण सबै प्रदेशमा समान रूपमा नपुगेको कारण पनि समस्या देखिएको बताउनु भयो। विशेषगरी केही प्रदेशमा संगठन विस्तार ढिलो भएकाले प्रतिनिधि सूचीमा छुट–पुट भएको उहाँले स्वीकार गर्नु भएको छ।
समावेशी प्रतिनिधित्व सुनिश्चित गर्न पार्टीले ३३ प्रतिशत आरक्षण, सभापतिलाई २०० प्रतिनिधि थप्ने अधिकार र समायोजन समितिबाट थप १०० देखि १५० प्रतिनिधि समावेश गर्ने व्यवस्था गरेको पनि उहाँले जानकारी दिनु भएको छ। उहाँले भन्नु भयो, ‘हामी सिक्दै छौँ, कतिपय कुरा अपेक्षाभन्दा फरक भए पनि सबैलाई समेट्ने प्रयास भइरहेको छ।’ उहाँले महाधिवेशनमा सहभागी प्रतिनिधिहरूले लामो समय, खर्च र मेहनत गरेर आएको भन्दै उनीहरूको असन्तुष्टि स्वाभाविक भएको टिप्पणी गर्नु भएको छ। साथै, व्यवस्थापनको कारण कार्यक्रम केही लम्बिन सक्ने अवस्था रहेको पनि उहाँले स्पष्ट पार्नु भयो।
