रामेछाप,१३ असार । उज्यालो नेपाल पार्टीका अध्यक्ष कुलमान घिसिङले सरकार उल्टो गतिमा चलेको आरोप लगाउनु भएको छ । मन्थलीमा भएको पत्रकार र नागरिक अगुवासँगको भेटमा बोल्दै घिसिङले सरकारले पेट्रोल र डिजेलको प्रयोग घटाउन विद्युतीय गाडीमा सहुलियत दिनु पर्नेमा उल्टो विद्युतीय गाडीमा कर लगाएर उल्टो बाटोमा हिँडेको बताउनु भयो ।
त्यस्तै शिक्षा र स्वास्थ्यमा भ्याट लगाउने कुरा पनि जनविरोधी कुरा भएको उहाँको धारणा छ । यो नीति रास्वपाको घोषणापत्र विपरीत समेत भएको उहाँले दाबी गर्नु भयो। ‘एक प्रतिशत नै किन नहोस्,यो नीतिगत कुरा हो नि’, उहाँले भन्नु भयो। अहिलेको सरकारको नीति श्रमिकमारा भएको उहाँले बताउनु भयो । श्रमिकहरूको न्यूनतम ज्याला नबढेकोले सरकार श्रमिकको पक्षमा नरहेको उहाँले बताउनु भयो ।
हिजो जनार्दन शर्मालाई बजेट हेरफेर गरेको भनी राजीनामा दिन लगाएको स्मरण गराउँदै उहाँले अहिलेका अर्थमन्त्रीले खुल्लमखुल्ला बजेटको दर हेरफेर गरेको कुरा सुन्नमा आएको उहाँले बताउनु भयो । सरकारले नागरिकको आत्मविश्वास बढाउन नसकेको उहाँको भनाइ छ । त्यो विश्वास नजगाएसम्म देशमा नै बसेर केही काम गरौँ भन्ने वातावरण नबन्ने उहाँको धारणा छ ।
