जनकपुर,१८ असार । मधेश प्रदेश सभाको बैठक विहीबार दोस्रो दिन पनि अवरुद्ध भएको छ । सभामुख रामअशिष यादवले बैठक अनिश्चित कालका लागि स्थगित भएको घोषणा गर्नु भएको छ। बैठक सुरु हुने वित्तिकै विपक्षी दलहरुले संसद अवरुद्ध गरेका थिए । जनमत पार्टीका सांसद संजय यादवले मधेश प्रदेश सरकारले १ करोड भन्दा कमको योजना नल्याउने भनेर घोषणा गरेपनि स–साना टुक्रा रेडबुकमा राखेको पाइएकाले विरोध जनाउनु भएको छ् । उहाँले बजेट पुनर्लेखन नभएसम्म सम्पूर्ण विपक्षी दलहरुले संसद अवरुद्ध गर्ने बताउनु भयो ।
त्यस्तै सांसद उपेन्द्र महतोले अहिलेको मधेश प्रदेश सरकारले संघीयता समाप्त पार्ने रोडम्याप तयार गरेको आरोप लगाउनु भएको छ । उहाँले प्रदेशको अर्थतन्त्रलाई नै समाप्त पार्नेतर्फ प्रदेश सरकार लागि परेको आरोप लगाउनु भएको छ। रौतहटमा एक अर्व ६६ करोडको एउटा टेन्डर आह्वान गरिएकोमा सांसद महतोले आपत्ति जनाउनु भएको छ । उहाँले रेडबुकमै नभएको योजनाको टेन्डर भएकोमा प्रश्न उठाउनु भएको छ । मन्त्रालयहरुले पाउने भन्दा पनि बढी रकमको टेन्डर गरिनुले आउने दिनमा प्रदेश सरकारको व्ययमा थपिने सांसद महतोले बताउनु भएको छ ।
उहाँले संघीयतालाई नै समाप्त पार्ने गरी कार्य कहाँबाट गर्न खोजिएको भनेर मुख्यमन्त्री कृष्ण यादवलाई प्रश्न गर्नु भएको छ । मुख्यमन्त्री कृष्ण यादवले संघीयता समाप्त पार्नेतर्फ लागेको र उहाँलाई सत्ताधारी नेकपा माओवादी र नेकपा एमालेले पनि साथ दिइरहेको सांसद महतोले आरोप लगाउनु भएको छ् । सांसद महतोले नेपाली कांग्रेस दल लासको पार्टी भएको आरोप लगाउनु भएको छ । हिजो (बुधबार) बसेको बैठकमा पनि विपक्षी दलहरुले विरोध जनाएपछि बैठक आजका लागि स्थगित भएको थियो । अब अर्को बैठक कहिले बस्ने भन्ने निश्चित छैन ।
