काठमाडौं,३१ असार । उद्योग तथा वाणिज्य तथा श्रम एवं उपभोक्ता हित समितिका सभापति रहबर अन्सारीले देशभरका घरधुरीमा रहेका एलपी ग्यास सिलिन्डरको एकीकृत डिजिटल अभिलेख (डाटाबेस) निर्माण गर्न सरकारलाई आग्रह गर्नु भएको छ। उहाँले प्रभावकारी अनुगमन, आपूर्ति व्यवस्थापन र उपभोक्ता सुरक्षाका लागि घर–घरमा रहेका ग्यास सिलिन्डरको विवरण समेट्ने डिजिटल प्रणाली आवश्यक रहेको बताउनु भएको छ ।
बुधबार बसेको समितिको बैठकमा बोल्दै अन्सारीले हाल राज्यसँग प्रत्येक घरमा कति वटा ग्यास सिलिन्डर छन् भन्ने आधिकारिक तथ्यांक नभएकाले अनुगमन र व्यवस्थापनमा समस्या भइरहेको बताउनु भएको छ । उहाँले घरधुरी म्यापिङमा आधारित एकीकृत प्रणाली विकास गरी ग्यास कम्पनी, वितरक र नेपाल आयल निगमले समेत कुन घरमा कति सिलिन्डर छन् भन्ने जानकारी प्राप्त गर्न सक्ने व्यवस्था गर्नुपर्नेमा जोड दिनु भएको छ ।
अन्सारीले यस्तो प्रणाली विकास गर्न ठूलो चुनौती नरहेको उल्लेख गर्दै वर्तमान सरकारकै कार्यकालमा कार्यान्वयनमा ल्याउन आग्रह गर्नु भएको छ। उहाँका अनुसार डिजिटल प्रणाली लागू भएपछि ग्यास वितरणलाई थप पारदर्शी, व्यवस्थित र प्रभावकारी बनाउन सहयोग पुग्नेछ । बैठकमा उहाँले भारतसँग प्रस्तावित एलपी ग्यास पाइपलाइन परियोजनाको विषयमा पनि सरकार थप सक्रिय हुनुपर्ने आवश्यकता औंल्याउनु भयो । भारत सरकारले विभिन्न समयमा परियोजनाप्रति चासो देखाएको भए पनि त्यसलाई कार्यान्वयनको चरणमा पु¥याउन नेपाल सरकारले कूटनीतिक तथा प्राविधिक पहल तीव्र बनाउनुपर्ने उहाँको भनाइ थियो ।
उहाँले सरकारलाई भारतसँग समन्वय गरेर पाइपलाइन निर्माणको स्पष्ट समयसीमा, भण्डारण क्षमता तथा कार्ययोजना सार्वजनिक गर्न आग्रह गर्नु भएको छ । साथै, ग्यास उद्योगहरूको सहकार्यमा हाउजिङ सोसाइटी तथा घना बस्तीहरूमा सामूहिक ग्यास वितरण प्रणालीको प्रवद्र्धन गर्न पनि उहाँले सुझाव दिनु भएको छ।
