दमक, ३२ असार। नेपाली कांग्रेस कोशी प्रदेश संसदीय दलकी पुर्व सचेतक तथा भौतिक पूर्वाधार विकास राज्यमन्त्री शोभा चेम्जोङ पालुङ्वाले कोशी प्रदेश सरकारको नेतृत्व कांग्रेसले पाए एमालेसँगको सत्ता सहकार्यलाई निरन्तरता दिन सकिने बताउनुभएको छ।
उज्यालो खबरसँगको टेलिफोन संवादमा उहाँले वर्तमान राजनीतिक परिस्थितिमा सरकार परिवर्तनको अवस्था सिर्जना भए पनि कांग्रेसले मुख्यमन्त्रीसहित सरकारको नेतृत्व गर्ने अवस्थामा एमालेसँगकै सहकार्य कायम राख्न सकिने धारणा व्यक्त गर्नुभयो।
उहाँले भन्नुभयो, “अबको सरकारको नेतृत्व कांग्रेसले त्यस्तो अवस्था बने एमालेसँगको सहकार्यलाई निरन्तरता दिन हामी तयार हुन सक्छौं।”
यसअघि नेपाली कांग्रेसको प्रदेशस्तरीय संयन्त्र बैठकले कोशी प्रदेशमा एमालेसँगको सत्ता सहकार्य प्रभावकारी नरहेको निष्कर्ष निकालेको थियो। तर सचेतक पालुङ्वाले सरकारको स्थायित्व र जनअपेक्षा पूरा गर्न वर्तमान गठबन्धन तत्काल भत्काउनु उपयुक्त नहुने धारणा राख्नुभयो।
उहाँका अनुसार कांग्रेस र एमालेबीचको सहकार्य राजनीतिक स्थायित्वका लागि भएको हो। अहिले नै अर्को दलसँग नयाँ समीकरण बनाउने वा कांग्रेस प्रतिपक्षमा फर्किने निर्णयले जनतामा सकारात्मकभन्दा नकारात्मक सन्देश जाने उहाँको भनाइ छ।
“नयाँ बजेट कार्यान्वयनको चरणमा छ। जनताले विकास र सेवा प्रवाहको अपेक्षा गरेका बेला सरकारबाट बाहिरिने वा नयाँ सत्ता समीकरण खोज्ने काम जनभावनाअनुकूल हुँदैन। सकेसम्म अहिलेको सहकार्यलाई निरन्तरता दिनुपर्छ भन्ने हाम्रो चाहना हो,” पालुङ्वाले भन्नुभयो।
पालुङ्वाको अभिव्यक्तिले कांग्रेसभित्र सत्ता नेतृत्व परिवर्तनको माग बलियो रहे पनि एमालेसँगको गठबन्धन पूर्ण रूपमा अन्त्य गर्ने पक्षमा भने सबै नेताहरू नरहेको संकेत गरेको छ।
यसअघि कांग्रेस -एमालेको सहकार्यमा समेत आलोपालो सरकारको नेतृत्व गर्ने भन्ने सहमति भएको थियो ।
पार्टीको केन्द्रसग समेत छलफल गरेर यो जटिलताको निकास निकालिने समेत उहाले बताउनु भयो ।
