काठमान्डौं ,१ साउन। सरकारले अब रिक्त वा नयाँ स्थापना भएका सरकारी निकायहरूमा नयाँ व्यक्तिलाई करार सेवामा नियुक्त नगर्ने भएको छ। सङ्घीय मामिला तथा सामान्य प्रशासन मन्त्रालयले एक परिपत्र जारी गर्दै आवश्यक जनशक्ति हाल ’पुल’ मा रहेका करार कर्मचारीहरूबाटै व्यवस्थापन गर्ने जनाएको हो।
परिपत्र अनुसार नयाँ स्थापना भएका निकाय वा रिक्त स्वीकृत दरबन्दीमा करार कर्मचारी आवश्यक परेमा नयाँ व्यक्ति भर्ना गर्न पाइने छैन। यस्तो अवस्थामा सम्बन्धित निकायले सामान्य प्रशासन मन्त्रालयमार्फत ’पुल’ मा रहेका करार कर्मचारी माग गर्नुपर्नेछ र उनीहरूसँगै करार सम्झौता गरी काममा लगाउनुपर्नेछ। सङ्गठन तथा व्यवस्थापन सर्वेक्षण (इ७ः) स्वीकृत भएपछि पनि सम्बन्धित निकायले आवश्यकता अनुसार यही ’पुल’ का कर्मचारीलाई खटाउन सक्ने व्यवस्था गरिएको छ।
यसअघि सरकारले आफूहरूलाई हटाउन लागेको भन्दै करार कर्मचारीहरू आन्दोलनमा उत्रिएका थिए। तर, प्रधानमन्त्री तथा मन्त्रिपरिषद्को कार्यालयले कर्मचारीहरूलाई हटाउन नलागिएको स्पष्ट पारेपछि आन्दोलन स्थगित भएको थियो।
