कठमान्डौं, ७ साउन । नेपालको राजनीतिमा फेरि एउटा नयाँ दृश्य देखिँदैछ। राष्ट्रिय स्वतन्त्र पार्टी (रास्वपा) का सभापति रवि लामिछाने चीन भ्रमणको तयारीमा छन्।
अगस्टको दोस्रो साता चार सदस्यीय टोलीसहित बेइजिङ जाने तयारीले अहिले राजनीतिक वृत्तमा चासो बढाएको छ।
भारत भ्रमणपछि अब चीनतर्फ बढेको लामिछानेको कदमलाई धेरैले केवल औपचारिक भ्रमणका रूपमा मात्र हेरेका छैनन्। यसलाई रास्वपाले आफ्नो अन्तर्राष्ट्रिय सम्बन्ध विस्तार गर्ने प्रयासका रूपमा पनि विश्लेषण गर्न थालिएको छ।
चीन भ्रमणका क्रममा चिनियाँ विदेशमन्त्री वाङ यी र चिनियाँ कम्युनिस्ट पार्टीका उच्च नेतासँग भेटवार्ता हुने भनिएको छ।
यसअघि भारतीय प्रधानमन्त्री नरेन्द्र मोदीसँग भेट गरेका लामिछाने अब चीनको उच्च तहसँग संवाद गर्न खोजिरहेका छन्। यसले रास्वपाले परम्परागत दलभन्दा फरक शैलीमा अन्तर्राष्ट्रिय सम्बन्धलाई अघि बढाउन खोजेको संकेत दिएको छ।
पाँच दिनको भनिएको यो भ्रमणमा नेपाल–चीन सम्बन्ध, विकास, लगानी र सहकार्यका विषयमा छलफल हुने बताइएको छ।
तर राजनीतिक वृत्तमा अर्को बहस पनि सुरु भएको छ–
नयाँ शक्तिका रूपमा उदाएको रास्वपा अब राष्ट्रिय राजनीतिबाट बाहिर अन्तर्राष्ट्रिय मञ्चमा आफ्नो स्थान बनाउन खोज्दैछ ?
रवि लामिछानेको चीन भ्रमणले कूटनीतिक सम्बन्ध मात्र होइन, नेपालको आगामी राजनीतिक यात्रामा उनको भूमिकाबारे पनि नयाँ चर्चा जन्माएको छ।
