काठमाडौँ , १३ भदौ। शनिबार दिउँसो १२ बजेर ४१ मिनेट गएको थियो । त्रिभुवन विश्वविद्यालय शिक्षण अस्पताल अगाडी शान्तिकुमारी थारुले अस्पतालको शव गृह अगाडीको गेटमा सूचना टाँस्दै हुनुन्थ्यो। सूचनामा लेखिएको छ सम्पर्क नम्बर ९७४८७२७१२४, ९८६९६४७९६५,९८१६५४२०४५, सीरिम थारु बर्दिया, रसुवाबाट हराएको ।’
शान्तिकुमारीले यथाशीघ्र खोजी कार्यमा सहयोग गरिदिन सबैमा आग्रह गर्नु भयो । शान्तिकुमारी परिवारका सदस्य खोजीका लागि काठमाडौँ आइपुग्नु भएको हो। उहाँले अहिलेसम्म वीर अस्पताल, ट्रमा सेन्टर तथा शवदाह गृहसम्म पुगेर खोजी गरिसकनु भएको छ। यस्तै, प्रहरी कार्यालय, बारबर्दिया नगरपालिकामा पनि विस्तृत विवरण टिपाइसकनु भएको छ ।रसुवागढी भन्सार नजिकै काम गर्न जानु भएको बर्दियाको ३० वर्षीय सीरिम थारु र ३१ वर्षीय सन्तोष थारु बाढीपछि सम्पर्कविहीन हुनु भएको हो । उहाँहरू चार दिनदेखि बेपत्ता हुनु भएको हो ।
बेपत्ता परिवारका सदस्य शान्तिकुमारीका अनुसार उहाँहरू निजी घर निर्माणको कामका लागि लेबरको रूपमा रसुवा पुग्नु् भएको थियो। घटना घटेको दिन बिहान ६ बजेसम्म परिवारसँग अनलाइनमार्फत कुराकानी भएको र ७ बजेदेखि काममा खटिने जानकारी गराउनु भएको थियो । त्यसपछि आएको भीषण बाढीयता उहाँहरूसँग कुनै सम्पर्क हुन सकेको छैन ।
बेपत्ता परिवारले उद्धार कार्यलाई अझ तीव्र बनाउन सरकारसँग आग्रह गर्नु भएको छ। शान्तिकुमारी थारुले भन्नु भयो, ‘सरकारले हालसम्म गरेको उद्धार राम्रो छ, तर अझै धेरै मानिसहरू बेपत्ता भएकाले हामी आत्तिएका छौँ । बाँकी रहेका सबैको छिटोभन्दा छिटो खोजी गरी सत्य तथ्य सार्वजनिक गरिदिन अनुरोध गर्दछौँ । ’
