काठमाडौं,८ असोज । अब अपाङ्गता भएका व्यक्तिले बैंक धाउनुपर्ने झन्झटबिना इसेवा एपबाटै २ लाख रुपैयाँसम्म कर्जा लिन सक्ने भएका छन्।
इसेवा र सिटिजन्स बैंक इन्टरनेसनलले अपाङ्गता भएका व्यक्तिलाई लक्षित गर्दै ‘स्वावलम्बन कर्जा’ डिजिटल सुविधा सुरु गरेका हुन्।
यो कर्जाअन्तर्गत १० हजारदेखि २ लाख रुपैयाँसम्म रकम लिन सकिनेछ। कर्जाको वार्षिक ब्याजदर ९.९९ प्रतिशत र प्रशोधन शुल्क ०.७५ प्रतिशत तोकिएको छ।
कर्जा लिनका लागि इसेवा खाता kyc प्रमाणित भएको हुनुपर्नेछ। साथै, नेपाल सरकारबाट जारी अपाङ्गता परिचयपत्र, कम्तीमा ६ महिनादेखि इसेवा प्रयोग गरेको र तलब वा व्यवसायबाट नियमित आम्दानी भएको हुनुपर्नेछ।
योग्य व्यक्तिले इसेवा एपको गृहपृष्ठमा रहेको ‘स्वावलम्बन कर्जा’ ब्यानरमा क्लिक गरेर आवेदन दिन सक्नेछन्।
डिजिटल प्रक्रियाबाट कर्जा आवेदन दिन सकिने भएकाले बैंकसम्म पुग्ने र कागजी प्रक्रिया पूरा गर्ने झन्झट कम हुने अपेक्षा गरिएको छ।
इसेवाका प्रमुख कार्यकारी अधिकृत जगदीश खड्काले डिजिटल प्रविधिमार्फत अपाङ्गता भएका व्यक्तिको कर्जामा पहुँच सहज बनाउन सुविधा ल्याइएको बताउनु भयो। सिटिजन्स बैंकका प्रमुख सञ्चालन अधिकृत रोशन मानन्धरले यस सहकार्यले अपाङ्गता भएका व्यक्तिलाई औपचारिक कर्जाको पहुँच विस्तार गर्न सहयोग पुग्ने बताउनु भयो।
