दमक, १५ असोज । दमकमा होटल म्यानेजमेन्ट अध्ययन गराउँदै आएको पाथीभरा कुलिनरी आट्र्सका विद्यार्थीहरूले बिहीबार दसैँ विशेष कार्यक्रम आयोजना गरेका छन्।
दसैँको भाव झल्काउने गरी विद्यार्थीहरूले चङ्गा बनाएर सजाएका थिए। कक्षाभित्रै पिङसमेत हालिएको थियो भने नौरथामा गरिने दुर्गा पूजाको धामसमेत निर्माण गरिएको थियो।
केराको थम्बा गाडेर, जमरा उमारेर र दसैँमा अग्रजबाट टीका लगाउँदाको झल्को दिने गरी विद्यार्थीहरूले कक्षाकोठालाई सजाएका थिए। त्यसैगरी, दसैँमा खाने विभिन्न परिकारका आफ्ना पाककला पनि उनीहरूले प्रदर्शन गरेका थिए।
कार्यक्रममा उपस्थित प्राध्यापक तथा अन्य अतिथिलाई विभिन्न परिकार खुवाउँदै विद्यार्थीहरूले आफ्नो प्रोजेक्ट वर्क पूरा गरेको कलेजका अध्यक्ष बलभद्र कोइरालाले जानकारी दिनुभयो।
