काठमाडौं ,२९ कार्तीक। राष्ट्रपति रामचन्द्र पौडेलले छठ पर्वले समाजमा विद्यमान वर्गीय, जातीय, लैङ्गिक लगायत सबै प्रकारका विभेद, कुरीति र विसङ्गतिको अन्त्य गर्न प्रेरणा दिने विश्वास व्यक्त गर्नु भएको छ।छठ पर्वका अवसरमा शुभकामना सन्देश जारी गर्दै उहाँले मौलिक संस्कृतिको संरक्षण तथा संवर्दन गर्दै नेपालीबीच राष्ट्रिय एकता, आपसी सदभाव र सहिष्णुता थप सुदृढ बनाउन यस पर्वले महत्त्वपूर्ण भूमिका खेल्ने बताँउनु भयो ।
उहाँले यस पर्वले सामाजिक तथा प्राकृतिक सन्तुलनको सन्देश प्रवाह गर्दै आएको बताँउनु भयो। उहाँले सूर्य, जल र पृथ्वीप्रति श्रद्धा व्यक्त गर्दै छठी माताको पूजा, अर्चना र व्रत गरी नदी, खोला, पोखरी तथा तालतलैयाको किनारमा जाग्राम बसेर हर्षोल्लासका साथ छठ मनाउने परम्परा रहेको उल्लेख गर्नु भयो ।विशेषगरी तराई तथा मधेश क्षेत्रमा मनाइने छठ पर्व पछिल्लो समय काठमाडौं उपत्यका लगायत पहाडी तथा हिमाली जिल्लाहरूमा समेत श्रद्धा र भक्तिपूर्वक मनाउने चलन बढ्दै जानु खुसीको विषय भएको उहाँले बताँउनु भयो ।
दीर्घायु, स्वच्छता, सात्विक भोजन, संयमता, सद्भाव र समृद्धिको कामनासहित मनाइने यस पर्वले सूर्यदेवको आराधना मार्फत सामाजिक तथा प्राकृतिक सन्तुलनको सन्देश दिने उहाँले बताँउनु भयो ।छठ पर्व अवसरमा स्वदेश तथा विदेशमा सबै नेपालीलाई शुभकामना समेत व्यक्त गर्नु भयो । उहाँले छठ पर्वले सामाजिक विभेद र विसङ्गतिको अन्त्य गर्दै मुलुकमा दिगो शान्ति, सुशासन, विकास र समृद्धि हासिल गर्न प्रेरणा प्रदान गरोस् भन्दै छठी माता र सूर्य भगवानसँग सबै नेपालीको कल्याणको कामना समेत गर्नु भयो।
