झापा, ३ मंसिर । झापाको बाह्रदशी गाउँपालिकामा धान काट्ने मेसिनसंग मोटरसाइकल ठोक्किँदा दुई जनाको मृत्यु भएको छ। दुर्घटनामा मोटरसाइकलमा सवार दुवै जनाको घटनास्थलमै ज्यान गएको हो।गएराति करिब १०ः४० बजे बाह्रदशी गाउँपालिका–५ स्थित खटखटी टोलस्थित चारपाने–राजगढ भित्री सडकखण्डमा दुर्घटना भएको हो।राजगढबाट चारपानेतर्फ आउँदै गरेको प्रदेश १–०१–०१२ प ४६३८ नम्बरको मोटरसाइकल र विपरीत दिशाबाट जाँदै गरेको मधेश प्रदेश ०३–००२ त १०४० नम्बरको धान काट्ने मेसिन गाडी एकआपसमा ठोक्किएका थिए।
सो दुर्घटनामा मोटरसाइकलमा सवार दुई युवकको घटनास्थलमै मृत्यु भएको हो । मृत्यु हुनेहरुमा बाह्रदशी ५ चकचकीका गोपाल ताजपुरिया र बाह्रदशी २ बुट्टावारीका अशोक राजवंशी भएको बुझिएको छ । मृतकहरुको यकिन पहिचान खुलाउने प्रयास भइरहेको इलाका प्रहरी कार्यालय बिर्तामोडले जनाएको छ । वीभत्स दुर्घटना भएकाले मृतकहरुको अनुहार नै नचिनिने अबस्थामा पुगेको छ ।
उनीहरुको उमेर अन्दाजी ३० देखि ३५ वर्षको भएको अनुमान गरिएको छ । दुर्घटनापछि धान काट्ने मेसिन गाडी घटनास्थलमै छाडेर चालक फरार भएका छन्। फरार चालकको खोजी भइरहेको छ । दुर्घटना भएको भएको खबर प्राप्त हुनासाथ प्रहरी चौकी फुलबारीबाट प्रहरी सहायक निरीक्षक पुष्पलाल मिश्रको कमाण्डमा टोली खटिएर घटनास्थल सुरक्षित राखेको थियो । थप अनुसन्धानको लागि इलाका प्रहरी कार्यालय बिर्तामोडबाट प्रहरी नायव उपरीक्षक सन्तोष पाठकको कमाण्डमा टोली गएको थियो ।
राति १२ः४५ बजे कानुनी प्रकृयापश्चात् दुवै लाश पोस्टमार्टमको लागि प्रादेशिक अस्पताल भद्रपुर पठाइएको छ । दुवै सवारी साधन नियन्त्रणमा लिई इलाका प्रहरी कार्यालय बिर्तामोड ल्याइएको छ ।










