दमक, १५ भदौ । बुबा भिमप्रसाद र आमा सावित्रा रेग्मीको साहिलो छोराका रुपमा ०२६ साल मंसिर २९ गते फुयतप्पा इलाममा जन्मिएर झापाको खुदुनावारीमा मुलोथलो बनाउँदै आउनु भएका शिवप्रसाद रेग्मी कविता लेखनको यात्रामा शिव रेग्मी प्रणत नामले चिनिनुहुन्छ । ०४० को दशकको सुरुबाट कविता लेखेर आफ्नो सृजनशील यात्रा अघि बढाउनु भएका उहाँले कविता, गजल, गीत, निवन्ध, कथा, समालोचना क्षेत्रमा कमल चलाउँदै आउनु भएको छ ।
उहाँको ०४१ सालमा लेखिएको ‘आफ्नै कुरा’ शिर्षकको कविता पहिलोपटक पत्रिकामा प्रकाशित भएपछि उहाँलाई कविता लेख्नमा उत्साह जाग्दै गयो । कविता मार्फत आफ्ना भावना व्यक्त गर्ने बानी बन्यो । आफ्नै सन्तुष्ठिका लागि लेखिएका कविता पछि आएर अरुका लागि हुन पुगे । प्रज्ञा प्रतिष्ठानले आयोजना गरेको राष्ट्रिय कविता प्रतियोगितामा ०५२ सालमा उहाँको ‘आद्र्र विम्ब’ कविताले दोस्रोस्थान हाँसिल गरेपछि उहाँको कविता उहाँको निजी मात्रै भएर सीमित रहेन । त्यो प्राप्तिले उहाँलाई केही न केही लेखिरहने जिम्मेबारी थप्यो । फलस्वरुप ०५४ सालमा उहाँको पहिलो कविता कृति ‘पाखण्ड गीत’ प्रकाशित भयो ।
पूर्वमा गजल लेखनको सुरुवात हुँदै गर्दाका गजलका त्यो बेलाका अगुवा उहाँले गजल माहोल सिर्जना गर्नमा महत्वपूर्ण भूमिका निर्वाह गर्नुभयो । फलस्वरुप त्यसबेलासम्म गजलमा खाली रहेको कुन्ती नामक गजलकाव्य लेखेर गजलमा काव्य लेख्ने पहिलो गजलकारका रुपमा इतिहास निर्माण गर्नुभयो ।
प्रभावशाली कविता र गजल लेख्ने उहाँ चर्चाकोपछि भन्दा पनि प्रभावकारी सृजनाको पछि लाग्ने असल सर्जकका रुपमा चिनिनुहुन्छ । लीला लेखनका अभियन्ताका रुपमा समेत रहनुभएका उहाँ नेपाल र भारतका विभिन्न ठाउँबाट सम्मानित र पुरस्कृत हुनु भएको छ । पट्याँस पत्रकारिताका लागि भवानी पद्म पुरस्कार दमकबाट पट्याँस पत्रकारिताको मौलिक पुरस्कार समेत प्राप्त गर्नुभएको छ । जयेन्द्रप्रसाद प्रज्ञा पुरस्कार बिर्तामोड, सर्जक मञ्च बिर्तामोड, बृहत बालमहोत्सव दमक, सुसेली साँस्कृतिक समूह खुदुनावारीसहित दर्जनौं संस्थाहरुबाट उहाँ सम्मानित र पुरस्कृत हुनुभएको छ ।
सन् २०१७ मा क्रान्तिधारा मेरठ साहित्य महाकुम्भ भारत, सन् २०१७ मा सिक्किम साहित्य परिषद सिक्किम, २०१८ मा नेपाल भारत साहित्य महोत्सव भारतसहितबाट समेत सम्मानित भएर आफ्नो सृजनशील आयतन अन्तराष्ट्रियस्तरमा बढाउन सफल हुनुभएको छ ।
एमए र एमएड अध्ययन गरी निरन्तर रुपमा अध्यापन क्षेत्रमा रहनु भएका उहाँ हाल दमक ८ मा बसोबास गर्दै दमक बहुमुखी क्याम्पस र सरस्वती मावि दमकमा अध्यापन कर्ममा व्यस्त हुनुहुन्छ । सरकारले पालिकास्तरसम्म साहित्य र कला प्रवद्र्धनको कार्यक्रम ल्याउनु पर्ने आवश्यकतामा जोड दिने प्रणतसँग सृजनाप्रतिको मोह यो ‘अन्शीलन’ कार्यक्रममा प्रस्तुत गर्नेछौं । अनि उहाँका शक्तिशाली रचनाहरु पनि उसैगरी प्रस्तुत हुनेछन् । (हेरौं भिडियो )
