दमक, ४ असोज । बैदेशिक रोजगारबाट फर्किएर आएकाहरुको संगठन रिटर्नी फेडेरेसन नेपालको कोशी प्रदेश कमिटीको विस्तारित बैठक तथा प्रशिक्षण कार्यक्रम झापाको दमकमा सम्पन्न भएको छ ।
संविधान दिवसको सन्दर्भ पारेर आयोजित कार्यक्रममा नेकपा एमाले स्थायी कमिटी सदस्य तथा कोशी इञ्चार्ज शेरधन राईले देश विकासका लागि एमालेको जनसंगठनका रुपमा रहेको रिटर्नी फेडेरेसनको भूमिका अहम् रहने विश्वास व्यक्त गर्नुभयो । राज्यका नीतिसँग जोडिएर देशमा केही योगदान गर्ने रिटर्नीलाई सफल बनाउन आवश्यक रहेको समेत बताउनु भयो ।
नेकपा एमाले केन्द्रीय सदस्य तथा रिटर्नी फेडेरेसन इञ्चार्ज डा. कृष्ण केसीले परिवारसँगको विछोडमा विदेशमा संघर्ष गर्नुपर्दाको पीडा उल्लेख गर्दै विदेशबाट श्रम गरेर फर्किएकाहरुको दिगो व्यवस्थापनमा जोड दिनुपर्ने धारणा राख्नु भयो । उहाँले रिटर्नीका लागि सरकारले ठोस नीति निर्माण गर्नुपर्ने बताउनु भयो ।
एमाले कोशी प्रदेश अध्यक्ष घनश्याम खतिवडाले रिटर्नीलाई शुभकामना दिँदै एमालेका नेताहरुले पनि सामाजिक परीक्षणमा आफूलाई पास गराएर अघि बढ्नु आवश्य रहेको बताउनु भयो । तब मात्र मिसन ०८४ मा सफलता हाँसिल हुने धारणा राख्नु भयो ।
एमाले कोशी सचिवालय सदस्य एवम् कोशी प्रदेशसभा सदस्य होमबहादुर थापाले विदेशमा सिकेको ज्ञान, सीप र अनुशासनलाई प्रयोग गरी देशमा रोजगारी सिर्जना गर्ने कुरामा रिटर्नीहरुको भूमिका रहने उल्लेख गर्नुभयो ।
संगठनका केन्द्रीय अध्यक्ष उत्तम अधिकारीको प्रमुख उपस्थितिमा सम्पन्न सो बैठकले संगठनको कोशी प्रदेश कमिटीको संयोजक धर्मेन्द्र खड्का, सचिव एकराज सापकोटा सहितको अधिवेशन आयोजक कमिटी गठन गरेको छ । कार्यक्रममा कोशी प्रदेशका विभिन्न जिल्लाहरुबाट उपस्थिति रहेको थियो ।
