दमक, कार्तिक २७
एकै ठाउँमा ६ हजार भन्दा बढी गाई । ५ हजार भन्दा बढी स्थानीय समुदायलाई निःशुल्क हस्तान्तरण । कुनै पनि गाईको किनबेच हुँदैन । गाईले दूध दिउँन्जेल घरमा पाल्ने र थारो भएपछि यहीँ ल्याएर छोडिदिने ।
गाई धार्मिक रुपमा मात्रै नभएर वैज्ञानिकरुपमा पनि मानव जीवनसँग जोडिएको जीव हो । किनकि, विशेष हिन्दु शास्त्रमा त जन्मेदेखि मृत्यू पर्यन्त गाई चाहिन्छ । सवैका लागि दूध पिउन होस् वा दूधजन्य अन्य सामग्री । गाईको दूध र गहुँत समेत मानव जीवनका लागि प्रभावकारी मानेर विज्ञानले समेत पुष्टि गरेपछि गाई र मानव जीवनको सम्बन्ध अन्योन्यास्रित जस्तै छ ।
त्यसैले गाईलाई बेच्न हुँदैन, मार्न हुँदैन । बाचुञ्जेल सेवा गर्ने । दूध दिउन्जेल सेवन गर्ने हो । कालगतिले कुनै गाईको मृत्यू भएमा मात्रै उसको जीवन सकिन्छ । यत्ति कुरा आम मानिसलाई बुझाउनका लागि झापाको शिवसताक्षीस्थित सताक्षीधाममा एकजना सन्त बिगत एक दशकदेखि बसिरहनु भएको छ । उहाँको नाम हो नन्द किशोर महाराज ।
वर्षेनी गौ रक्षाका लागि भन्दै निकै ठूला महोत्सव लगाउनु हुन्छ । देश बिदेशबाट दिग्गज व्यक्तित्वहरुलाई समेत बोलाएर गाईको किन संरक्षण गर्ने, यसका फाइदा के हुन भनेर प्रवचन नै सुनाइन्छ । यसखाले प्रवचनपछि अहिले केही समुदायमा गाईको किनबेच घटेको छ । पाल्न नसक्नेहरुले यहाँ ल्याएर गाई छोडिदिन्छन् अनि गाईको सेवा गर्न चाहनेले यहीँ आएर गाई लिएर जान्छन् । अहिले यो क्रम यहाँ निरन्तर चलिरहेको छ ।
त्यसैले अहिले पनि यहाँको गोठमा ६ सय बढी गाई रहेका छन् । सबैलाई खान र बस्नका लागि व्यवस्था मिलाइएको छ । दुई तलेसम्मको गाईको गोठ पनि यहीँ बनिरहेको छ । दिनभरी जंगलमा चर्न गएका गाई साँझमा फर्केपछि पक्की गोठमा आनन्दले बस्न पाएका छन् ।
कुनै बेलाको अनकण्टार सताक्षीधाम अहिले भने भव्य संरचना सहित सबैको आँखामा पर्न सकेको छ । यहाँ अहिले भव्य भव्य मन्दिरहरु बनेका छन् । पूजा अर्चनाका लागि भक्तजनलाई सहज संरचना बनाइएको छ । गुरुकुल पद्धतिमा संस्कृत पढाउन छुट्टै भवन छ । ज्येष्ठ आमा बुबाको सेवा गर्न बृद्ध सेवा घर बेग्लै छ । यहाँ अहिले पनि हेरालु तथा अन्य कर्मचारी सहित गरेर ५० बढीले रोजगार पाएका छन् । सबैलाई छुट्टा छुट्टै बस्ने ठाउँ बनाइएको छ ।
आशा, आस्था, विश्वास अनि भरोसाका साथ काम गर्ने हो भने अभाव र समस्या कहिँबाट सिर्जना हुँदैन रहेछ । यहाँ अहिलेसम्म जति पनि संरचना निर्माण भएका छन्, ती सबै भक्तजनको भेटी, सहयोगी मनहरुको सहयोगबाट भएको हो । कुनै पनि सरकारी बजेट र कार्यक्रम यहाँ खास पर्न सकेको छैन ।
यो ठाउँ महाभारतकालीन सन्दर्भसँग जोडिएको धार्मिक मात्रै नभएर प्राकृतिक रुपमा पनि निकै सुन्दर छ । शान्त वातावरणले यहाँ पुग्ने सबैको मनलाई लोभ्याउछ ।
गाईको संरक्षण किन गर्नु पर्छ भनेर यो वर्ष पनि फेरि अर्को महायज्ञ यहाँ लाग्दैछ । मंसिर १४ देखि २४ गतेसम्म (११ दिवसीय) गोरक्षा महोत्सव हुने भएको हो ।
गोलोक गोवर्धन गौशालाको आयोजनामा हुने यो दशौँ धार्मिक महोत्सव हो । महोत्सवमा धनधान्याञ्चल ज्ञान महायज्ञ, पञ्चकुण्डीय श्रीरुद्र महायज्ञ, श्री तुलसी शालिग्राम , श्री सीताराम विवाह तथा लिङ्ग महापुराण कथा प्रवचन हुने छ । साथै यो पटक चाहि यहाँ ५१ फिट अग्लो सवा करोड रुद्धाक्षको दानाबाट शिवलीङ्ग पनि स्थापना गरिँदैछ ।
