दमक, माघ ४
जो कोहीसँग घुलमिल भइनहाल्ने अनि घुलमिल भएपछि उत्तिकै धेरै रमाइलो लाग्नुहुन्छ उहाँ । उहाँको नामको संयोजन नै अनौठो छ । कुरुप बस्तुहरुमा पनि सुन्दरताको दृष्टिले हेरेर त्यसलाई सुन्दरता भर्ने र सृजनामा उतार्न माहिर सुन्दरकुमार लावती सृजनामा ‘सुन्दर कुरुप’को नामले परिचित हुनुहुन्छ ।
दक्षिणी इलामको चुलाचुली हात्तिलेदामा पिता दल शमसेर लावती र माता रुक्मिणी लावतीका सन्तानका रुपमा वि.सं. २०३३ साल माघ २७ गते जन्मिनु भएका सुन्दरसँग आफू राम्रो संगीतकार बन्छु भन्ने इराधा थियो । त्यही सोचमा पढ्न काठमाडौं गएपनि संगीतकार बन्ने उहाँको सोचमा परिवारले साथ दिएन र साहित्य लेखनमा आफ्ना भावना पोख्न थाल्नुभयो ।
०५० को दशकको उत्तराद्र्धमा पूर्वमा बढेको गजल माहोलका प्रमुख अभियन्तामध्येका सुन्दर पूर्वाञ्चल गजल मञ्चमार्फत आफूलाई बाहिर ल्याउनु भयो । सृजनालाई न्याय गर्न शव्द शव्दलाई लामो समय लगाएर केलाउँदै त्यसलाई मनमनै गुनेर मनमै लेखिसकेपछि मात्र कापीमा उतार्नु हुन्छ । त्यसलाई पनि लामो समय लगाएर अन्तरमन्थन गर्दै, केलाउँदै, तौलिदै, सम्पादन गरेर मात्र बाहिर ल्याउने गम्भिरपन छ उहाँभित्र ।
सफल सर्जक हुन बहुल प्रकारको नेपाली समाजलाई बुझ्न, केलाउन अनि न्याय दिन सक्ने लेखनको आवश्यकता औंल्याउने उहाँ विगत २० वर्षदेखि पेशाले शिक्षक हुनुहुन्छ । पछिल्लो समय स्थानीय जनता माविमा शिक्षणमा आवद्ध उहाँ साहित्य सृजनाको गहिराईमा डुबुल्की मारेर बाँच्न रुचाउनु हुन्छ ।
कृतिगत हिसावले उहाँको हालसम्म गजल संग्रह ‘जुनको अनुहार’ र कविता संग्रह ‘पृथ्वीको आविस्कार’ प्रकाशित छ । सरल रुपमा गहनता बोकेका गजल र कविताबाट सबैको मन जित्न सफल उहाँका एकल वाचन समेत भएका छन् ।
सर्जकहरुको पुस्तक कृति प्रकाशन र प्रवद्र्धनमा जुटेको संस्था ’श्रष्ठा पब्लिकेसन’ दमकका अध्यक्ष, चुलाचुली गाउँपालिकाले गठन गरेको ‘भाषा, साहित्य, कला, संस्कृति तथा पर्यटन समन्वय समिति’का उपाध्यक्ष रहेर हाल सृजनाको संगठनात्मक गतिविधिमा सक्रिय हुनुहुन्छ ।
उहाँले २०६४ मा उर्लाबारी गजल मञ्च, २०७० मा ऐतराज केरुङ स्मृतिमा गजल पुरस्कार पाँचथर प्राप्त गर्नुभयो । २०७० मा मोतीराम भट्ट प्रतिभा पुरस्कार, २०७१ मा गजमञ्च मकवानपुर, २०७१ मै राजेश्वर रेग्मी स्मृति कोष विराटनगर, २०७९ मा जसोदा स्मृति पुरस्कारसहितका संस्थाहरुमार्फत पुरस्कार प्राप्त गर्नुभएको छ । उहाँसँग उज्यालो खबरको अनुशीलन कार्यक्रम गरिएको भलाकुसारी र उहाँका सृजना प्रस्तुति तलको भिडियोमा….
