दमक, माघ ३०
नेपालीभाषीकालागि विश्वस्तरीय अन्तर्राष्ट्रिय रियालिटी शो ‘मेरो भ्वाइस युनिभर्स’ र ‘मेरो डान्स युनिभर्स’को सिजन–२ को अडिसन पूर्वका लागि चैत २ र ३ गते बिर्तामोडमा हुने भएको छ ।
नेपालबाट तेस्रो मुलुक बसोबास गराइएका नेपालीभाषी भुटानीहरुले स्थापना गरेको इन्ट्रा–नेशनल वेलफेयर एण्ड सपोर्ट फाउण्डेसन अफ अमेरिकाको आयोजना हुँदै आएको रियालिटी शो ‘मेरो भ्वाइस युनिभर्स’ र ‘मेरो डान्स युनिभर्स’को सिजन २ को पूर्व अडिशन बिर्तामोड हुन लागेको इन्ट्रा–नेशनल वेलफेयरका नेपाल–भारत संयोजक राजेश घतानीले बताउनु भयो ।
हालसम्मकै सर्वाधित पुरस्कार राशि रहेको सो प्रतियोगितामार्फत विश्वमा छरिएर रहेका नेपालीभाषीलाई एक सुत्रमा बाँध्न मद्धत पुग्ने हिसाबले कार्यक्रम आयोजना गर्न लागिएको उहाँले उल्लेख गर्नुभयो ।
पूर्व अडिसनमा दुवै विधामा करिब ५ सय वढीले आवेदन दिने अनुमान गर्नुभयो । अनलाइनमार्फत एक सय बढीले आवेदन दिइसकेको समेत घतानीले जानकारी दिनुभयो ।
नेपाली जातिका कलाकारबीच प्रतिष्पर्धा गराइने यी दुबै शो का विजेताले १ करोड, उपविजेताले २५ लाख र तेस्रो हुनेले १० लाख पुरस्कार पाउने छन् ।
गत वर्ष गायनमा प्रितम राई (भारत) र नृत्यमा खुसी कार्की (थाइल्याण्ड) ले उपाधि हात पार्नुभएको थियो । सो वर्ष ५२ देशमा बसोबास गर्ने नेपालीभाषीले यसमा प्रतिष्पर्धा गरेका थिए । अमेरिकाकासाथै नेपालको काठमाडौं सहितमा अडिसन लिइएको थियो । फाइनल प्रतिष्पर्धा नेपालमा भएको थियो ।
