दमक, फागुन १
विद्यार्थीहरुको खेल प्रतिभा उजागर गर्ने उद्धेश्यले झापाको दमकस्थित हिमालय माद्यमिक विद्यालयमा आयोजित छात्रतर्फको जिल्लास्तरीय हिसान कप भलिबल प्रतियोगितामा भद्रपुरस्थित सिद्धार्थ शिशु सदनले उपाधि जितेको छ ।
सोमबारबाट सुरु भएको प्रतियोगिताको बुधबार सम्पन्न फाइनल खेलमा आदर्श कलेज बिर्तामोडलाई पराजित गर्दै सिद्धार्थले उपाधि हात पारेको हो । प्रतियोगितामा आस्था कलेज अफ मेनेजमेन्ट दमकले तेस्रो स्थान हाँसिल गरेको थियो ।
कार्यक्रममा पुरस्कार वितरण समारोहमा बोल्दै कार्यक्रमका प्रमुख अतिथि दमक नगर प्रमुख रामकुमार थापाले विद्यार्थीहरुको खेल कौशलताको प्रशंसा गर्दै खेलकुद विकासको महत्व दर्शाउनु भयो ।
निजी विद्यालय तथा उच्च विद्यालयको छाता संगठनका रुपमा रहेको हिसानले ग्लोबल एजुकेशनल एकेडेमी दमक ६ को व्यवस्थापनमा प्रतियोगिता आयोजना गरेको हो । गत वर्ष च्याम्पियन बनेको विद्यालयले यो वर्षको कार्यक्रम व्यवस्थापन गर्ने विधि अनुरुप ग्लोबलको व्यवस्थापनमा खेल सञ्चालन भएको छ ।
कार्यक्रमको समापनका क्रममा बोल्दै हिसानका जिल्ला अध्यक्ष टेकनाथ भण्डारीले विद्यार्थीहरुलाई खेलकुदप्रति प्रोत्साहित गर्न आयोजना भएको प्रतियोगितामा क्रिकेटको खेल समेत आयोजना गरिने जानकारी गराउनुभयो ।
कार्यक्रममा हिसानका कोशी प्रदेश सदस्य प्रकाश भण्डारीसहित झापा जिल्ला उपाध्यक्ष उत्तम खनाल, कोषाध्यक्ष रञ्जितकुमार शाह, ग्लोलब एजुकेशनल एकेडेमीका प्रिन्सिपल गुणराज अधिकारी, हिमालय माविका प्रधानाध्यापक द्रोणबहादुर श्रेष्ठसहितको आतिथ्यता रहेको थियो । विजेता विद्यार्थी टिमलाई ट्रफी, मेडल तथा प्रमाणपत्र प्रदान गरिएको छ ।
प्रतियोगिताकालागि झापाका २४ विद्यालयका विद्यार्थीका २४ टिमको सहभागिता रहेको ग्लोबलमा भाइस प्रिन्सिपल कृष्ण गुरागाईंले जनाउनु भयो ।
