एजेन्सी, फागुन २
भारतीय प्रधानमन्त्री नरेन्द्र मोदी र अमेरिकी राष्ट्रपति डोनाल्ड ट्रम्पबिच अमेरिकाको ह्वाइट हाउसमा द्विपक्षीय वार्ता भएको छ ।
वार्तापछि दुई नेताले संयुक्त पत्रकार सम्मेलन गर्दै दुई देशबीचको एकताले संसारलाई नयाँ सन्देश दिएर संसार बदल्न सक्ने भावको अभिव्यक्ति व्यक्त भएका छन् ।
सो अवसरमा बोल्दै अमेरिकी राष्ट्रपति ट्रम्पले मोदी र आफूले पारस्परिक व्यापारलाई सुदृढ पार्न छलफल सुरु गर्ने बताउनु भयो । भारतसँग अमेरिकाको व्यापार घाटा लगभग १०० अर्ब डलर रहेको भएपनि त्यसलाई सुधार गर्न छलफल अघि बढाउने ट्रम्पले उल्लेख गर्नुभएको अमेरिकी सञ्चारमाध्यमहरुले जनाएका छन् ।
भेटबार्ताका क्रममा ट्रम्पले २००८ को मुम्बई आक्रमणका आरोपी तहव्वुर राणालाई भारत सुपुर्दगी गर्ने घोषणा गर्नुभयो ।
भारतीय प्रधानमन्त्री मोदीले भन्नुभयो, ‘भारत र अमेरिकाको एकता र सहयोगले राम्रो संसारलाई आकार दिन सक्छ भन्नेमा हामी विश्वास गर्छौं । भारत र अमेरिका बिचको साझेदारीले लोकतन्त्र र लोकतान्त्रिक मूल्यमान्यता र प्रणालीहरूलाई बलियो बनाउँछ । हामी इन्डो–प्यासिफिकमा शान्ति, स्थिरता र समृद्धि बढाउन सँगै काम गर्नेछौँ ।’
उहाँले दुबै देशले सन् २०३० सम्ममा द्विपक्षीय व्यापार दोब्बर गर्ने लक्ष्य अघिसार्नुकासाथै आतंकवाद विरुद्धको लडाइँमा दृढतापूर्वक एकसाथ उभिएको समेत उल्लेख गर्नु भयो ।
