दमक, चैत ४
साहित्य परिषद भूटानको ३३ औं स्थापना दिवस सोमबार एक कार्यक्रमकाबीच झापाको दमकस्थित भूटानी शरणार्थी शिविर बेलडाँगीमा सम्पन्न भएको छ ।
कार्यक्रम नेपाल च्याप्टर, साहित्य परिषद् भूटानले आयोजना गरेको हो । संस्थाका अध्यक्ष दिल भूटानीको अध्यक्षतामा रहेको कार्यक्रमको प्रमुख अतिथि शिविर सचिव सञ्चहाङ सुब्बा रहनु भएको थियो । सुब्बाले नेपालीभाषी भूटानीहरु शरणार्थी अवस्थामा अलपत्र परेपनि आफ्नो भाषा, साहित्य, कला र संस्कृतिले जिउँदो हुन सकेको जनाउनु भयो ।
कार्यक्रममा साहित्य र सङ्गीतको प्रस्तुति रहेको थियो । गायक बलराम मगर,शेरबहादुर लावती, ओम सापकोटा आदिले प्रस्तुति दिनुभयो । यसैगरी, साहित्यकारहरु तिलक राई, अविलाल राई, चिरञ्जीवी राई, थिरु घिमिरे आदिको रचना प्रस्तुत भयो । कार्यक्रममा धार्मिक र जातीय संगठनका प्रतिनिधिहरुको पनि उपस्थिति थियो ।
आफ्नो देशबाट लखेटिनु परेपनि नेपाली भाषा, साहित्य, कला र संस्कृति संरक्षणमा शरणागत भूमिमा गठन भएको भाषा परिषद् आफ्नो लक्ष्यमा निरन्तर अघि बढिरहेको कार्यक्रममा जनाइयो ।
लक्षुमण बुर्जाले सञ्चालन गर्नु भएको कार्यक्रममा विरेन मगरले शव्दले स्वागत गर्दै संस्थाको गतिविधिमा सबैको सक्रिय सहभागिता आवश्यक रहनेमा जोड दिनुभयो ।
