दमक, चैत २२ । बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिमस्टेक ) को छैटौँ शिखर सम्मेलनमा भाग लिन थाइल्याण्डको बैंकक पुग्नु भएका प्रधानमन्त्री ओली र भारतीय प्रधानमन्त्री नरेन्द्र मोदीबीच बैंककमै आज भेटबार्ता हुने भएको छ ।
शिखर सम्मेलनमा पुग्नु भएका दुबै समकक्षीबीच अपराह्न चार बजे प्रधानमन्त्री मोदी बस्नु भएको बैंककस्थित म्याण्डारिन ओरियन्टल होटलमा साइडलाइन बार्ता हुन लागेको सञ्चारमाध्यमहरुले जनाएका छन् । ओलीले नेपाल भ्रमणको निम्तो दिएपनि मोदीले भने ओलीलाई भ्रमणको निम्तो नदिएको अवस्थामा अन्य देशमै सामान्य भेटवार्ता हुन लागेको हो । के के विषयमा बार्ता हुने भन्ने खुलाइएको छैन ।
नेपाली पक्षबाट परराष्ट्रमन्त्री डा. आरजु राणा देउवा, प्रधानमन्त्रीका प्रमुख सल्लाहकार विष्णु रिमाल, सल्लाहकार डा. युवराज खतिवडा, मुख्यसचिव एकनारायण अर्याल र परराष्ट्रसचिव अमृत राई पनि भेटबार्तामा सहभागी हुनु हुनेछ ।
यसअघि प्रधानमन्त्री ओली र मोदीबीच संयुक्त राष्ट्र सङ्घको महासभामा भाग लिन न्युयोर्क पुगेका बेला भेटबार्ता भएको थियो ।
पछिल्लो पटक गत असार ३० गते प्रधानमन्त्रीमा नियुक्त भएका ओलीलाई भारतले अहिलेसम्म भ्रमणको निम्तो दिएको छैन । तर ओलीले भने राष्ट्र सङ्घको महासभामा पुग्दा मोदीलाई नेपाल भ्रमणको निम्तो गरेका थिए ।
