दमक, २९ चैत / सृजनशील गतिविधिमा सक्रिय बन्दै आएको दक्षिणी इलामको चुलाचुली गाउँपालिकामा बैशाख १८ र १९ गते ‘चुलाचुली साहित्य उत्सव २०८२’ को आयोजना हुने भएको छ ।
चुलाचुली गाउँपालिकाले गठन गरेको ‘भाषा, साहित्य, कला, संस्कृति तथा पर्यटन समन्वय समिति’को आयोजनामा चुलाचुली ५ चपेटीस्थित भञ्ज्याङ एग्रो टुरिजममा उत्सव हुने भएको हो । चुलाचुलीको पर्यटनको सम्भावनालाई साहित्यसँग जोड्ने उत्सवको लक्ष्य समेत रहेको समितिका अध्यक्ष विवश बलिभद्र कोइरालाले जनाउनु भयो ।
उत्सवमा कोशी प्रदेशका सर्जकलाई प्रतिनिधिमूलक सहभागिता गराइने छ । उत्सवको पहिलो दिन ‘प्रतिनिधिमूलक कविता वाचन’, ‘कवि र कविता’ र ‘गजल साँझ’ आयोजना हुनेछ । सोही दिन ग्रामिण पर्यटन प्रवद्र्धनमा साहित्यको योगदान विषयक बहस समेत हुनेछ । दोस्रो दिन ‘हाम्रो सिर्जना : स्थानीय कविका कविताहरु’ कार्यक्रममा चुलाचुलीका कविका कविता प्रस्तुत हुनेछन् । ‘प्रतिनिधिमूलक रचना वाचन’का साथै ‘चुलाचुलीमा नाटक : हिजो, आज र भोलि’ विषयक बहस कार्यक्रम समेत हुने अध्यक्ष कोइरालाले उल्लेख गर्नुभयो । सो अवसरमा सांगीतिक प्रस्तुति समेत हुनेछन् ।
चुलाचुली क्षेत्रको सृजना प्रवद्र्धनका लागि गाउँपालिकाले वर्षेनी कार्यक्रममा आर्थिक व्यवस्थापन गर्दै आएको छ ।
