पथरी, ३ बैशाख /
मोरङको पथरी शनिश्चरे वडा नम्बर ४ को पिपल डाँडामा प्याराफिट सहितको सुविधा सम्पन्न फुटबल खेलमैदान निर्माण हुने भएको छ ।
सिद्धार्थ आधारभूत विद्यालयको भोगचलनमा रहेको रहेको १३ कट्ठा ऐलानी जग्गामा नगरकै पहिलो प्याराफिट सहितको खेलमैदान बन्ने भएको हो ।
लागू औषध तथा दुर्व्यसनीबाट टाढा राख्ने अभिप्रायले यस खेलमैदान निर्माणले उनीहरूको खेल सीप र क्षमता बृद्धि हुने आशा राखिएको सिद्धार्थ खेलमैदान उपभोक्ता समितिका सचिव छत्र लिम्बुले बताउनुभयो ।
समितिका अध्यक्ष राजकुमार मगरले सिद्धार्थ आधारभूत विद्यालयको स्वामित्वमा रहेको उक्त खेलमैदान निर्माण गर्न सबै पक्षको चासो र ध्यान जानुपर्नेमा जोड दिनुभयो ।
हालका लागि पथरी शनिश्चरे नगरपालिकाबाट ८ लाख रुपैयाँ बजेट विनियोजन भएकोले अहिले सो खेल मैदानमा निर्माण कार्य भइरहेको ४ नम्बर वडाध्यक्ष लोकनाथ न्यौपानेले जानकारी दिनुभयो ।
आगामी वर्ष सम्ममा निर्माण सम्पन्न गर्ने लक्ष्य लिइएको खेलमैदानमा करिब ५० लाख लागत लाग्ने र सोको व्यवस्थापनका लागि कोशी प्रदेश तथा सङ्घीय सांसदहरू मार्फत आवश्यक पहल भइरहेको वडाध्यक्ष न्यौपानले उल्लेख गर्नुभयो ।
