दमक, ९ बैशाख / केही न केही लेखिरहने नशाले परदेशमा झनै सृजना जन्मिने वातावरण बन्यो । अर्थात परदेशमा घरदेशको सम्झनाले दुख्ने मुटु अनि त्यहाँको संघर्षको कठीन भोगाईले झापा कमल गाउँपालिका ७ का साहित्यकार चन्द्र सम्बाहाम्फेलाई झनै सृजनशील बनायो ।
बाबु गंगाप्रसाद सुब्बा र आमा पुरकुमारी सुब्बाको सन्तानका रुपमा वि.सं २०३८ चैत २५ गते कमल ७ मा जन्मिनु भएका उहाँ विशेष गरी कविता, गजल र गीतमा कमल चलाउँदै आउनु भएको छ ।
स्वदेशमा देखेका र भोगेका भोगाईमा जन्मिएका अनि परदेशमा दुःखमा मौलाउने अवसर पाएका सृजनाहरुलाई यतिबेला चन्द्रले कृतिका रुपमा बाहिर ल्याउने तयारी गरिरहनु भएको छ । अग्लो हुनुभित्रको दम्भलाई प्रतिक मानेर पहिलो कृतिगत सन्तान कविता संग्रह ‘पहाडको पैताला’ लाई सृजना यात्रामा हिँडाउने तयारीमा हुनुहुन्छ । श्रीमती कुमारी थाम्सुहाङ र छोरी निङ्वा हाङमाको आत्मिय साथमा आफूलाई अझ उर्जाशील बनाएर सृजनकर्ममा तल्लिन हुनुहुन्छ ।
०६० को दशकको सुरुवातताका गजल लेखनको लहरमा लहरिँदै उहाँले लेखनयात्रा अघि बढाउने क्रममा दुबईमा रहँदा साथीसँगी मिलेर खडा गरेको सगरमाथा साहित्य प्रतिष्ठानमार्फत गतिविधि गर्न भ्याउनु भयो । कोषाध्यक्ष हुँदै हाल सो प्रतिष्ठानको संरक्षक सदस्य रहनु भएको छ ।
सांस्कृतिक मिथकलाई कविता, गजल र गीतमा उन्न शिपालु उहाँका हालसम्म ३ वटा गीत रेकर्ड भएका छन् । उहाँसँग सृजनाका सन्दर्भमा भएको भलाकुसारी र सृजना प्रस्तुति उज्यालो खबरको ‘अनुशीलन’ कार्यक्रमको २८ औं श्रृंखलामा प्रस्तुत छ, हेरौं भिडिओ :
