बाह्रदशी, १० वैशाख । न्यायिक समितिमा थुप्रिएका मुद्दाको चाङ र आफ्नो जिम्मेवारीमा रहेका अरु थुप्रै कामहरुलाई पन्छाएर बाह्रदशी गाउँपालिका उपाध्यक्ष शान्तादेबी शिवाकोटी खरेल मंगलवारदेखि पिछडिएका समुदायका महिलाको अवस्था वुझ्न निस्कनुभएको छ ।
यस क्रममा उहाँले मंगलवार वडा नम्बर १ को सिप्ता वस्तीका मुस्लिम महिलालाई गाउँमै पुगेर भुट्नुभयो ।
‘ सन्थाल, मुस्लिम, दलित तथा पिछडा वर्गका महिलालाई कानुनी सचेतना कार्यक्रम’को व्यानरमा प्रमुख प्रशासकीय अधिकृत जनार्दन निरौलासहित केही कर्मचारीलाई साथ लिएर उहाँ पिछडिएका वस्ती वस्ती पुगिरहनुभएको छ ।
गाउँ कार्यपालिकाको खटनपटनमा छुट्याइएको सीमित वजेटका भरमा पिछडिएका समुदायको आँगनमै पुग्ने उपाध्यक्षको यो जमर्कोलाई कर्मचारीहरुले पनि खुलेरै साथ दिएका छन् । यसरी पिछडिएका समुदायका महिलाका समस्या वुझ्दै गाउँ पुग्नुभएकी खरेलले वुधवार वडा नम्बर २ मा जनता वजारका मुस्लिम महिलाको गुनासो सुन्नुभयो । यसअघि घरबाहिर निस्कनसमेत नपाइरहेका मुस्लिम महिलाहरु पनि न्यायिक समितिसमक्ष आफ्ना गुनासोका गाँठाहरु फुकाउन तम्तयार भएर कार्यक्रममा उपस्थित भएका थिए ।
तीव्र वजारीकरण हुँदै गरेको राजगढ बजार नजिकको यो मुस्लिम वस्तीका महिला वर्षौंदेखि ‘अधिकारविहिन’ अवस्थामा छन् । शिक्षा, स्वास्थ्यजस्ता मौलिक हकबाट वञ्चित हुनपरेकोमा उनीहरुलाई खासै गुनासो छैन । घरका पुरुषले चाहेजति श्रीमती भित्र्याउँदासमेत उजुरबाजुर गर्ने निकाय उनीहरुले अहिलेसम्म देखेका छैनन् । पालिका कार्यालय त के, वस्तीदेखि आधा किलोमिटर दूरिमा रहेको वडा कार्यालय पनि धेरैले देखेकै छैनन् । कार्यक्रममा उपस्थित हानेरुन खातुन भन्नुहुन्छ—‘ चार जना छोरा छन् । तिनको अहिलेसम्म नागरिकता बनेन । नागरिकता नै नहुँदा न विदेश जान पाए, न यतै कुनै काम पाउँछन् ।’
सचेतना अभियान सुरु भएको दुई दिनमै मुस्लिम र पिछडिएका समुदायका महिलाका अनगिन्ति पींडा छताछुल्ल भएका छन् । कतै बालविवाहका कारण छोरीचेलीको भविष्य अन्धकारमा डुबेको, वर्षेनि सन्तान जन्माउनुपर्दा धेरै महिलाको स्वास्थ्य चिन्ताजनक अवस्थामा पुगेको, अनि नियमित खोप लगाउन नपाउँदा कुपोषित बनेका बालबालिकाहरु मुस्लिम वस्तीका हृदयविदारक दृश्य हुन् । सन्थाल, राजवंशीजस्ता मूलबासी समुदायका महिला पनि लगभग यस्तै व्यथा सहिरहेका छन् ।
