दमक, १५ बैशाख । शिक्षक आन्दोलन भएको आज २७ दिन भयो । तरपनि न समस्या समाधान गर्ने निकाय झुक्न चाहेको छ न समस्या सुनाउनेको आवाज घटेको छ ।
हिजो संघीय राजधानी काठमाडौ केन्द्रित आन्दोलन अहिले देशव्यापी हुन थालेको छ । यही क्रममा सोमबार दमकको गणतन्त्र चोकमा पनि यस क्षेत्रका शिक्षकहरुले प्रर्दशन गरेका छन् ।
‘शिक्षा ऐन जारी गर’ ‘शिक्षक माथीको प्रहरी दमन बन्द गर’ भन्दै नारा लगाएको आवाजले दमक चोक गुन्जिएको थियो । गणतन्त्र चोकमा शिक्षकहरुले आफ्नो स्थानीय तहका नेता, जनप्रतिनिधिलाई पनि बुझाउन भन्दै लगाइएको नारा हो । सयौं संख्यामा सहभागी शिक्षकहरुले कोणसभाको आयोजना गर्दै सरकारलाई गणतान्त्रिक शिक्षा ऐन जारी गर्न माग गरेको सो क्रममा गौरादहस्थित जनता माविका प्रधानाध्यापक रत्न कट्वालले बताउनु भयो ।
राज्य संयन्त्र सामुदायिक विद्यालयको शिक्षा मासेर निजी विद्यालयलाई प्रोत्साहन गर्न लागि परेको आरोप लगाउँदै शिक्षक महासंघ गौरादहका अध्यक्ष लिलानाथ गौतमले भन्नु भयो ‘शिक्षकको माग पुरा गर्दा सत्ताधारीहरुको खर्च घट्ने चिन्ताले आन्दोलनलाई लिंगरिङ गरिरहेको छ ।’
राज्यले धरपकड गरेपछि सडक प्रदर्शनरत नेपाल शिक्षक महासंघले त्यसखाले दमनको विरोधमा आफूहरुलाई समर्थन गर्न सबै पेशागत संस्था, शिक्षा सरोकार समूह एवं सबै नेपालीलाई अपील गरेको छ । २५ दिन सम्म शान्तिपूर्ण रुपमा जारी सडक प्रदर्शनको २६ औं दिनमा केही शिक्षकले बानेश्वरको निषेधित क्षेत्र तोड्न खोज्दा आइतबार प्रहरीले धरपकड गरेको थियो ।
