पथरी, १६ बैशाख / मोरङको पथरी शनिश्चरेमा पहिलो पटक पथरी शनिश्चरे नगरस्तरीय खुला सिंगिङ तथा डान्सिङ आइडल २०८२ हुने भएको छ ।
२०७५ मा नगरपालिकाको उपसमितिका रुपमा गठित कला साहित्य प्रवद्र्धन समितिको आयोजनामा बैशाख २६ गतेबाट गायन र नृत्यको आइडल हुने भएको मंगलबार आयोजित पत्रकार सम्मेलनमा जानकारी गराएको छ । समितिका अध्यक्ष धनराज राई अमीरले चार चरणमा हुने प्रतियोगिताको पहिलो चरणको खुला अडिसन बैशाख २६ गते हसन्दह बजारमा र २७ गते पथरी बहुमुखी क्याम्पसमा हुने जनाउनु भयो । उहाँले नगर बाहिर बस्ने नगरवासीका लागि भनें भर्चुअल अडिसन समेत गरिने उल्लेख गर्नुभयो ।
दोस्रो चरणको छनोट कार्यक्रम जेठ ३ गते पथरी बहुमुखी क्याम्पसमा हुनेछ, जसबाट उत्कृष्ठ २०/२० जनाको छनोट गरिने छ । तेस्रो चरण जेठ १० गते एभरेष्ट बोर्डिङमा सञ्चालन गरी उत्कृष्ठ १० /१० जना छानिनेछन् । त्यसपछि बन्द प्रशिक्षण समेत सञ्चालन सकेपछि चौथो तथा फाइनल चरण जेठ २४ गते हरियाली सामुदायिक वन समूहको हलमा हुने तय भएको पनि अध्यक्ष राईले पत्रकारहरुलाई जानकारी गराउनु भयो ।
फाइनलमा दुबै विधाका पहिलो, दोस्रो र तेस्रो हुनेलाई क्रमशः नगद ४० हजार, २० हजार र १० हजार तथा मेडल र प्रमाणपत्र प्रदान गरिने छ । कार्यक्रमको समापनका दिन नगर क्षेत्रका एकजना सर्जकलाई नगद २५ हजार, मुहारचित्र र सम्मानपत्रले सम्मानित समेत गरिने कार्यक्रम रहेको पनि जानकारी गराइएको छ । समग्र कार्यक्रमका लागि नगरपालिका कार्यालयको ६ लाख रुपैयाँ बजेट विनियोजन भएको छ ।
विगत ७ वर्षदेखि यसखाले कार्यक्रम सञ्चालन भइरहेको अवस्थामा गत वर्ष प्रथम पोएट आइडल सञ्चालन भएको र यो वर्ष प्रथम सिंगिङ तथा डान्सिङ आइडल सञ्चालन गरिने तयारी भएको सचिव लक्ष्मीप्रसाद फूयाँलले जनाउनु भयो । पत्रकार सम्मेलनमा गीत संगीत विभाग प्रमुख अर्जुन सेञ्चुरी, नृत्य विधाका संयोजक रामबहादुर विश्वकर्माले विधागत प्रतियोगिताको सम्बन्धमा प्रष्ट्याउनु भयो । कार्यक्रममा समितिका सल्लाहकारका रुपमा रहनु भएका सर्जक एवम् पत्रकार भूपेन्द्रराज तिम्सिना, पथरी शनिश्चरे सूचना संयोजक सन्तोष राईसहितका स्थानीय पत्रकारहरुको उपस्थिति रहेको थियो ।
