पथरीशनिश्चरे, २६ बैशाख / अर्सित कार्कीको ह्याट्रिक संगै प्रभात सामुदायिक फुटबल क्लब पथरीमा जारी फुटबल प्रतियोगिताको फाईनलमा प्रवेश गरेको छ ।
पथरी रंगशालामा आज सम्पन्न पहिलो सेमिफाइनलमा प्रभातले नाजरिन फुटबल क्लबलाई ४-० ले स्तब्ध बनाउँदै फाईनल यात्रा तय गरेको हो ।
प्रभातका लागि सुरुवाती ११ मिनेटमा नै स्ट्राईकर अर्सित कार्कीले पहिलो गोल गर्दै आफ्नो टिमको लागि खाता खोल्नु भयो । दिपेन माझिले हानेको फ्री-किक पोलमा ठोक्किएर फर्केपछि अर्सितले गोल गर्नु भयो ।
खेलको १८ औं मिनेटमा प्रभातका क्याप्टेन सुरज राउतले गोल गर्ने सुन्दर अवसर पाएपनि गोल गर्न सफल हुनु भएन। उहाँको प्रहार पोलमा ठोक्किएर बाहिरिएको थियो ।
नजरिनका दिवान राईले २९ औं र ३२ औं मिनेटमा पाएको गोल गर्ने अवसर पनि खेर फाल्नु भएको थियो । उहाँको दुवै प्रहार पोल माथिबाट बाहिरिएको थियो ।
पहिलो हाफमा १-० ले अग्रता लिएको प्रभातले दोस्रो हाफको शुरूवातमा गोल गर्ने अवसर पाए पनि जर्सी नं १३ का खेलाडी समीर याक्खाले गोल गर्न सक्नु भएन । याक्खाले गोल गर्ने दुईवटा सुन्दर अवसरहरु खेर फालेपनि ४९ औं मिनेटमा धिरेन क्षेत्रीले गोल गर्दै क्लबलाई २-० को अग्रता दिलाउनु भयो ।
खेलको म्यान अफ द म्याच घोषित स्ट्राईकर अर्सित कार्कीले ६० औं मिनेटमा उत्कृष्ट गोल गर्नु भयो भने ३० सेकेन्ड बित्न नपाई पुनः १ गोल थपेर ह्याट्रिक पूरा गर्नु भयो ।
४-० को जित निकाल्दै फाईनलमा प्रवेश गरेको प्रभातले भोलि हुने देविगञ्ज फुटबल क्लब र सुनौलो कल्याण फुटबल क्लब बिचको दोस्रो सेमिफाइनलको विजेतासंग वैशाख ३० गते फाईनल खेल्नेछ ।
