दमक, २८ बैशाख / जीवन स्मृति प्रतिष्ठान झापाले जीवन स्मृति पुरस्कारका लागि प्रतिभा छनौट गरेको छ ।
प्रतिभा छनौट समितिको सिफारिसमा कार्यसमितिले जीवन स्मृति पुरस्कार २०७८ का लागि स्रष्टा लीला उदासी, २०७९ का लागि मदन पुरस्कार विजेता नियात्राकार युवराज नयाँघरे, २०८० का लागि कलाकार बिक्रमश्रि र २०८१ का लागि कथाकार रीता ताम्राकारलाई प्रतिभा छनौट गरेको छ । युवा प्रतिभा प्रोत्साहन पुरस्कारका लागि सर्जक चोमू शेर्पा खुशीलाई छनौट गरेको संस्थाका सचिव धनकुटे कान्छाले जानकारी गराउनु भयो । प्रतिष्ठानका अध्यक्ष भूमिप्रसाद दाहालको अध्यक्षतामा सम्पन्न बैठकले सो निर्णय गरेको हो ।
ती पुरस्कारहरु जीवन आचार्यको स्मृति दिवसको अवसरमा जेठ महिनामा कार्यक्रम गरी प्रदान गरिने छ । जीवन स्मृति प्रतिभा पुरस्कार जनही २०,१११ नगद र ताम्रपत्र साथै जीवन स्मृति युवा पुरस्कार १०,१११ नगद र ताम्रपत्र सहितबाट पुरस्कृत गरिनेछ ।
जीवन आचार्य चर्चित कवि, कलाकार, डिजाइनर तथा स्तम्भकारका रुपमा ०३० को दशकदेखि चर्चा कमाएका दमकका सर्जक हुनुहुन्थ्यो । उहाँको नाममा जीवन स्मृति प्रतिष्ठान स्थापना भइ हरेक वर्ष संस्थाले प्रतिभा पुरस्कार प्रदान गर्दै आएको छ ।
