दमक, ८ जेठ / किरात सांस्कृतिक मिथकमा आधारित चलचित्र ‘सेमिफूङ’ (आगोको फूल) जेठ ९ र १० गते दमकमा प्रदर्शन हुने भएको छ ।
चलचित्र निर्माण पक्षले दमकमा पत्रकार सम्मेलन गर्दै दमकस्थित डीम्याक्स हलमा चलचित्र प्रदर्शन गर्ने जानकारी गराएको हो । लिम्बू पृष्ठभूमिको चलचित्र भएको भएपनि ‘सेमिफूङ’ले आदिवासी जनजाति मात्र नभएर गैर आदिवासी जनजातिको पनि मिथ बोलेको यसका लेखक राज थापा काउचा मगरले उल्लेख गर्नुभयो ।
विविधतामाथि अर्को संस्कृतिले हस्तक्षेप गर्ने प्रकारका गतिविधि समेत भएको प्रसंग समेत थापाले अघि सार्नुभयो । उहाँले प्रविधि र चेतनाको विकासले उपनिवेशीकरण समेत सिर्जना गरेकोले मानिस विचारको संकटको चौबाटोमा आइपुगेको सुनाउनु भयो । ‘उपनिवेशीकरणसहितले सिर्जना गरेको वैचारिक संकटले मौलिक सांस्कृतिक पक्षमाथि समेत संकट पारेको कुरा ‘सेमिफूङ’ ले स्मरण गराउने छ ।’–उहाँले प्रष्ट्याउनु भयो ।
४० लाखको लगानी भएको जानकारी गराउँदै सो चलचित्रका नायक वविन आङदेम्बेले पूर्वको संस्कार संस्कृतिको कथा पूर्वबाटै प्रदर्शनमा ल्याइएको उल्लेख गर्नुृभयो ।
पत्रकार सम्मेलनमा किरात याक्थुङ चुम्लुङ दमकका अध्यक्ष देवेन्द्र चेम्जोङ, लिम्बू चलचित्रकर्मी कलाकार विक्रम फागो वनेम, ‘सेमिफूङ’ का गीतकार साङ्गसेन पन्धाकसहितको उपस्थिति रहेको थियो ।
रवि शेर्माको निर्देशन रहेको याक्थुङ फिल्मस् प्रालिको व्यानरमा निमित सो चलचित्र इलाम, झापा र मोरङमा छायांकन गरिएको छ । चलचित्रमा अधिकांश नेपाली भाषा र केही मात्रामा लिम्बू भाषा समेटिएको छ ।
