दमक, १२ जेठ / झापाको दमकमा रहेको सर्पदंश उपचार केन्द्रले पछिल्लो १० महिनामा सर्पले डसेका ६ सय ६ जनाको उपचार गरेको छ । चालू आर्थिक वर्षको साउनदेखि बैशाख मसान्तसम्ममा सर्पको डसाईबाट घाइते बिरामीको उपचार गरेको हो ।
उपचार केन्द्रको तथ्याङकअनुसार साउन महिनामा १ सय ४७, भदौमा १ सय १९, असोजमा ८८, कार्तिकमा ७१, मंसिरमा ३९, पुसमा १५, माघमा ९, फागुनमा ८, चैत्रमा ४३ र बैशाखमा ४० बिरामीको उपचार गरेको विवरण छ ।
केन्द्रमा विषालु र अविषालु दुबै खाले सर्पको टोकाइका बिरामीहरु आउने गरेको उपचार केन्द्रका बरिष्ठ प्राविधिक खेमचन्द्र अधिकारीले जानकारी दिनुभयो । अधिकारीका अनुसार यहाँ आउने अधिकांश बिरामीको उपचारपश्चात सामान्य अवस्थामा घर फर्कने गरेका छन् । केही जटिल अवस्थाका बिरामीको भने भेन्टिलेटरमा राख्नैपर्ने विरामी भए विर्तामोड, धरान र बिराटनगरका अस्पतालमा रेफर गरिने गरेको अधिकारीको भनाइ छ ।
नेपाल रेडक्रस सोसाइटी उपशाखा दमकको प्राविधिक सहयोगमा सञ्चालित सर्पदंश उपचार सेवा केन्द्रले पूर्व नेपालका धेरै जिल्लाका नागरिकहरुलाई सेवा प्रदान गर्दै आएको छ ।
