झापा जेठ १८ । महिनावारी महिलाको जीवनसँग जोडिएको एक प्राकृतिक प्रक्रिया हो । तर अझै पनि यस विषयमा समाजमा अनेक भ्रम, संकोच र रुढीवादी सोच व्याप्त छन् । यिनै सोचलाई बदल्ने प्रयासस्वरूप झापा, कमल गाउँपालिका – ५ स्थित मंगलमय माध्यमिक विद्यालयमा एक सचेतनामूलक कार्यक्रम सम्पन्न भएको छ ।
मे २८, विश्व महिनावारी स्वच्छता दिवसको अवसरमा विद्यालयमा आयोजित नाटक प्रतियोगितामा विद्यार्थीहरूले प्रस्तुति दिएका थिए । सात वटा समूहले प्रस्तुत गरेको नाटकमा महिनावारीका समयमा देखिने शारीरिक र मानसिक समस्यासँगै समाजमा व्याप्त अन्धविश्वास र रुढीवादी दृष्टिकोणलाई प्रष्टसँग चित्रण गरिएको थियो । नाटकमा स्वास्थ्यकर्मीको भूमिकामा देखिएका विद्यार्थीहरूले समस्याको समाधानका उपायहरू समेत प्रस्तुत गरका थिए ।
हरेक शुक्रबार अतिरिक्त क्रियाकलाप हुँदै आएको विद्यालयमा यो पटक, विद्यार्थीहरूको चासो र समाजमा सकारात्मक सन्देश फैलाउँने उद्देश्यले यो सचेतनामूलक नाटक प्रदर्शन गरिएको बिद्यालयका प्रधानाध्यापक मोहन बगालेको भनाइ छ ।
रङ्गकर्मी राज थापा स्थानीयस्तरमा निर्माण गरिने यस्ता नाटकले समाजमा परिवर्तन ल्याउँन महत्वपूर्ण भूमिका खेल्ने धारणा राख्नुहुन्छ ।
यस्ता प्रकारका कार्यक्रमले समाजमा रहेको परम्परागत सोच र भ्रमलाई तोड्दै स्वस्थ सोच विकास गर्ने अपेक्षा बिद्यालयले लिएको बिद्यालयका व्यवस्थापन समिति अध्यक्ष टिकाराज सापकोटाको भनाइ छ ।
कार्यक्रम कोशी प्रदेश सरकारको स्वास्थ्य मन्त्रालय, स्वास्थ्य कार्यालय झापा र स्वास्थ्य इकाइ मंगलबारेको सहयोगमा सम्पन्न भएको थियो ।
