दमक, २६ जेठ / मोरङको पथरी शनिश्चरे १० स्थित जिरिखिम्ती खण्डमा व्यक्तिको जग्गामा सडक रहेको र सडकको नक्सामा व्यक्तिको घरजग्गा भएको वर्षौंदेखिको समस्या समाधानका लागि संघीय सरकारको भौतिक पूर्वाधार तथा यातायात मन्त्रालयमा छलफल अघि बढाइएको छ ।
फराकिलो गरी एसियन हाइवे निर्माणका क्रममा जिरिखिम्तीको सो समस्या समाधानमा मुआब्जाको माग गर्दै आएका त्यहाँका स्थानीयवासीसहितको संघर्ष समितिको टोलीले जनप्रतिनिधिहरुलाई सामेल गराइ मन्त्रालयमा फाइल पेस गरेको छ ।
मोरङ निर्वाचन क्षेत्र नम्बर ३ मा पर्ने सो समस्याको समाधानका लागि सोही क्षेत्रका प्रतिनिधिसभा सदस्य डा. सुनीलकुमार शर्माको नेतृत्वमा पथरी शनिश्चरे वडा नम्बर १० का अध्यक्ष जीवन खतिवडा तथा संघर्ष समितिका संयोजक मदन पोखरेलसहित पीडित जग्गाधनीका प्रतिनिधिहरु छलफलमा सहभागी भएका थिए ।
भौतिक योजना तथा यातायात मन्त्री देवेन्द्र दाहाल, मन्त्रालयका सचिव, आयोजना प्रमुखसँग टोलीले छलफल गरेको हो । सो छलफलमा मन्त्री दाहालले जग्गाको समस्या समाधान गर्न जग्गा हालसाबिक गर्न आवश्यक सहजीकरण र निर्णय गर्ने प्रतिबद्धता समेत गर्नु भएको छलफलमा सहभागि सो वडाका पूर्व वडा सदस्य अनोज घिमिरेले जनाउनु भयो । उहाँले भन्नु भयो, ‘पहिले पूर्वपश्चिम सडक बन्दादेखिकै पुरानो समस्या अव समाधान होला भन्ने आशा लागेको छ ।’
टोलीले हालसाबिक गरिदिनु पर्ने वा मुआब्जा दिनु पर्ने वा नक्सामै सडक बन्नु पर्ने ३ वटा विकल्प सहित माग राखेका थियो । मन्त्रालय र आयोजनाले हालसाबिक गर्न सहज रहेको हुँदा सोही गर्न आवश्यक सहजीकरण र आवश्यक परे क्याबिनेट निर्णय गरिदिने प्रतिबद्धता मन्त्री दाहालबाट भएको घिमिरेले उल्लेख गर्नुभयो ।
पहिले पूर्वपश्चि महेन्द्र राजमार्ग निर्माणका क्रममा टोलको पश्चिमतर्फ रहेको मोरङ्गी खोलाको पुल निर्माण गर्दै जाँदा नक्सा भएको स्थानमा भासिएकाले त्यसभन्दा केही उत्तर सारेर पुल निर्माण गर्दै सडकपनि केही उत्तरमा निर्माण भयो । तर नक्सा भनें फेरवदल नहुँदा व्यक्तिको जग्गामा सडक बनेको र सडकको जग्गामा व्यक्तिको घर जग्गा हुन पुग्दा जग्गा पास नहुने समस्या रहिआएको छ । यस क्रममा १८ घरसहित ४१ कित्ता जग्गामा समस्या देखिदै आएको थियो । हाल आएर सडकले नक्सा अनुसार सडक निर्माण गर्ने तयारी गरेपछि स्थानीयले ३ वटा विकल्पमाथि छलफल गरेर समस्या समाधान गर्नुपर्ने अड्डी कसेपछि त्यहाँको सडक निर्माणको काम नै रोकिन पुगेको छ ।
