दमक, २८ जेठ / सानै उमेरबाट पाल्पामै हुँदादेखि गीत संगीतको लत बस्यो । अझ त्यसमा पनि त्यस क्षेत्रको सांस्कृतिक महत्वका रुपमा जोडिने गरेको लोक दोहोरीप्रति मन गढ्यो । फलस्वरुप शिवबहादुर नेपाल अर्थात एसके पाल्पाली पूर्वी नेपालमा आएर लोकदोहोरीलाई प्रवद्र्धन गर्ने एक अभियन्ताका रुपमा स्थापित बन्नु भयो ।
पाल्पाको तात्कालिन देउराली गाउँपञ्चायत वडा नम्बर ७ मा मेघराज र माता वसन्तादेवीका छैटौं सन्तानका रुपमा २०२४ साल जेठ १० गते जन्मिनु भएका उहाँ परिवारसहित २०३७ सालमा झापाको लखनपुर बसाई सरेर आउनु भयो । हाल दमक ८ मा बसोबास गर्दै लोकगीत संगीत र जनवादी गीत संगीतमा लागिरहनु भएका उहाँ विकास निर्माण, सहकारी अभियानका विषयमा पनि गीत गाएर आफ्नो छुट्टै पहिचान बनाउनु भएको छ ।
राष्ट्रिय जनसांस्कृतिक मञ्चका पूर्व केन्द्रीय सदस्य, पूर्वेली लोकदोहोरी परिवारका संयोजक, राष्ट्रिय लोक तथा दोहोरी प्रतिष्ठानका कोशी प्रदेश सदस्य, नेकपा एमाले कोशी प्रदेशको साहित्य कला विभाग सदस्य रहेर लोकगीत संगीतमा सक्रिय हुनुहुन्छ । उहाँसहितको समूहले सहकारी गीतको एल्बम ‘अनुरोध’ प्रस्तुत गरेर सहकारी प्रवद्र्धनमा सघाउनु भयो । दमक रवि चिसापानी सडक निर्माणको गीतमा पनि उहाँको सक्रियता रह्यो । उहाँ हास्यव्यंग्यका प्रस्तोताका रुपमा पनि चिनिनुहुन्छ ।
पूर्वाञ्चल लोकगीत प्रतियोगिता, साहित्यक कला संगम दमक, सहकारी संस्था झापासहितबाट सम्मानित पुरस्कृत बन्दै पूर्वमा पछिल्लो समय लोकगीतको निर्णायकको रुपमा पनि भूमिका निर्वाह गर्दै नवयुवा पुस्तालाई लोकगीत संरक्षणमा उत्प्रेरणा भरिरहनु भएको छ । उज्यालोखबर र रेडियो किङ्ग एफएम १०४.१ मेगाहर्जमा कार्यक्रम ‘अनुशीलन’ को ३५ औं श्रृंखलामार्फत उहाँसंग गरिएको भलाकुसारीको भिडिओ सामग्री :
