पथरी : मोरङको कानेपोखरी गाउँपालिका स्थित ६ नम्बरको दहिधापमा अर्काको जग्गा हेर्न आउने भू माफियाहरुलाई स्थानीय सुकुम्वासीहरूले कुटपिट गरेका छन् ।
बिहिबार ६ नम्बरको दहिधापमा काठ्माडौं निवासी हिरामणी दाहाल र हरिप्रसाद दाहालको नाममा रहेको जग्गा हेर्न आउने तीन जनालाई मरणासन्न हुने गरी कुटपिट गरेको हो । रामेछाप जिल्ला सुनपाती गाउँपालिका घर भई काठमाडौँ बस्दै आएका सेरबहादुर मगर, काठमाडौँ जोरपार्टी ७ बस्ने पर्लादमान सिंह बस्नेत र सोलुखुम्बु दुधकुन्जा नगरपालिका बस्ने नूतन श्रेष्ठलाई स्थानीयले पक्राउ गरी कुटपिट गरेको हो । आक्रोशित स्थानीयहरूले उनीहरू सवार बा ९ च ५७७३ नम्बरको कार पनि तोडफोड गरेका छन् ।
घटना स्थलमा तत्काल स्थायी प्रहरी चौकी रमाइलोका प्रहरी आएपछि थप क्षति हुनबाट बचेको थियो । भिड जम्मा हुँदै गएपछि प्रहरीले भिडलाई नियन्त्रण गर्न गाह्रो भयो । इप्रका पथरी र सशस्त्र प्रहरी बल शनिश्चरेका बेस क्यामबाट थप सुरक्षा बल थप गरेपछि प्रहरीले साँझ तिर भिडबाट नियन्त्रण लिएका थिए ।
सुकुम्वासी तथा स्थानीयको घेराभित्रबाट ७ घण्टा पछि नियन्त्रणमा लिएका तीन जनालाई अहिले इलाका प्रहरी कार्यालय पथरीमा राखेर थप अनुसन्धान गरिरहेको डिएसपी कृष्ण खड्काले बताए । उनीहरू त्यहाँ आएर जग्गाको फोटो खिच्ने र भिडियो खिच्ने काम गर्दै गर्दा स्थानीयले देखेपछि पक्राउ गरी सोधपुछ गर्दै कुटपिट गरेका थिए ।
यहाँ यो घटना भने नौलो होइन, यस अघि २०७३ सालमा पनि यस्ता घटना भएको थियो । उतिखेर तीन जना मध्ये सेरबहादुर मगरले ठुलै ग्याङ ल्याएर नाप जाँप गर्दा स्थानीय र उनिहर बिच झडप भएको वडा नं. ६ का वडाध्यक्ष खड्ग बस्नेतले बताए । तीन जना मध्ये सेरबहादुर मगर भू माफियाको मुख्य नाइके रहेको छ ।
घटनामा ती मध्ये सोलुखुम्बु दुधकुन्जा नगरपालिका बस्ने नूतन श्रेष्ठ निर्दोष देखिन्छ । श्रेष्ठलाई कार चालक पर्लादमान सिंह बस्नेतले त्यस तर्फ ल्याएर आएको बताइएको छ । सेरबहादुर मगर र कार पर्लादमान सिंह बस्नेत पुरानो चिनजान भएको उनीहरूले बताएका छन् ।
नूतन श्रेष्ठ काठ्माण्डौं मल्टीप्रपोज कन्स्ट्रक्सन कम्पनीका निर्देशक रहेको छ । पर्लादमान सिंह बस्नेत भने सोही कम्पनीको सिओको चालक रहेको छ । जुन क्षति भएको बा ९ च ५७७३ नम्बरको कार पनि सोही कम्पनीको सिओको कार रहेको कम्पनीको होल्ड टेक्निकल डिपार्टमेन्ट मनोज पौडेलले बताए । काठमाण्डौं मल्टीप्रपोज कन्स्ट्रक्सन कम्पनीले झापाको गौरीगञ्जमा एउटा फाक्टरीको कन्स्ट्रक्सन सम्बन्धी काम भइरहेकोले त्यस तर्फ काममा नूतन श्रेष्ठ आउने जाने गरेको श्रेष्ठले बताए ।
वडा नं. ८ दहिधाप माथि काठमाडौँ निवासी हिरामणी दाहालको नाममा १२ विगाह र हरिप्रसाद दाहालको नाममा १३ विगाहको पुर्जा रहेको छ । उनीहरूको पुर्जाले वन क्षेत्र पनि भेटेको वडाध्यक्ष खड्ग बस्नेतले बताए । जुन क्षेत्रमा सुकुम्वासीको बस्ती रहेको छ ।
दाहाल परिवारले उतिखेर मालपोतको कर्मचारीसँगको मिलेमतोमा पैसा खर्च गरी सो बराबरको जग्गाको पुर्जा आफ्नोमा बनाएको वडाध्यक्ष बस्नेत बताउँछन् । त्यस जग्गामा सेरबहादुर मगरको ७० लाख खर्च गरेको बताउँछ । यस अघि पनि ६ करोडमा जग्गा दिँदै छन् भनेर धरानको गोपाल विष्ट, गछियाको भूपाल तामाङ र सुन्दरहरैचाको अशोक जिम्बा त्यस स्थानमा आएका थिए ।
