दमक, २७ असार । आज अर्थात शुक्रबार विश्व जनसङ्ख्या दिवस हो। संयुक्त राष्ट्र संघको आवह्रानमा यो दिवस विश्वका विभिन्न मुलुकमा विभिन्न कार्यक्रम गरी मनाइँदै आएको छ। राष्ट्र संघका अनुसार विश्वको जनसङ्ख्या १ अर्ब पुग्न लाखौँ वर्ष लाग्यो भने त्यसपछिको २ सय वर्षमा विश्वको जनसङ्ख्या ७ गुणाले बढ्यो।
सन् २०११ मा विश्वको जनसङ्ख्या ७ अर्ब पुगेको थियो भने २०२१ मा यो ७ अर्ब ९० करोड पुगेको छ। जनसङ्ख्या निरन्तर वृद्धि भइरहेको छ। सन् २०३० मा ८ अर्ब ५० करोड, २०५० मा ९ अर्ब ७० करोड र २१०० मा १० अर्ब ९० करोड पुग्ने अनुमान गरिएको छ।
जनसङ्ख्या वृद्धिमा प्रजनन दरमा भएका परिवर्तन, बढ्दो सहरीकरण र बसाइँसराइले दूरगामी प्रभाव पारेको रेडियो किङ एफ एम को नियमीत कार्यक्रम सत्य संवादमा कुरा गर्दै पत्रकार तथा जनसंख्याका अध्यता चेतन अधिकारीले बताउनु भयो ।
विगतको तुलनामा वर्तमानमा आर्थिक अभाव, असुरक्षा, स्वास्थ्य, शिक्षा, आवास लगायत विषयलाई दृष्टिगत गरी प्रजनन उमेरका युवायुवतीले बालबच्चाको चाहना कम गरेका अध्ययनको निष्कर्ष छ।
राष्ट्र संघीय जनसङ्ख्या १४ देशका १४ हजारभन्दा बढी मानिससँग गरेको सर्वेक्षणअनुसार प्रजनन उमेरका अधिकांश वयस्कले इच्छाअनुसार बच्चा नजन्माउनुको कारण बालबालिकाको हेरचाहमा समस्या, रोजगारीको असुरक्षा, स्वास्थ्य, जलवायु परिवर्तन, महामारी, युद्ध र वातावरणीय क्षतिलाई मानिएको छ।
