दमक|२८ असार । पछिल्ला वर्षहरुमा तुलनात्मक रुपमा संघीय तथा प्रदेश सरकारबाट योजना कम पाइरहेको दमक नगरपालिका वडा नं १ मा यस आर्थिक वर्षदेखि भने सरकारी लगानीमा उल्लेख्य वृद्धि देखिन थालेको छ। वडामा विकास निर्माणको गतिमा नयाँ उचाइ ल्याउने गरी संघ र प्रदेशका महत्वपूर्ण योजना लागू हुन थालेका छन्।
यसअघि स्थानीय बजेटले मात्र धानेको वडा नं १ ले अहिले संघीय र प्रदेश सरकारको समन्वयमा ठूला तथा दीर्घकालीन प्रभाव पार्ने योजना कार्यान्वयन गर्न थालेको हो। विशेषगरी, वडाका मुख्य सडकहरुमा बजेट अभावका कारण वर्षौंदेखि अलपत्र बनेका योजनाहरू अब संघीय तथा प्रदेश सरकारको लगानीमा अघि बढ्न थालेका छन्।
वडाका जनप्रतिनिधिहरूका अनुसार, अहिले कतिपय पुराना सडकहरुको स्तरवृद्धि, कालोपत्रे, नाला निर्माण जस्ता कामहरू प्रदेश सरकारमार्फत अघि बढाइएको छ। त्यस्तै, संघीय सरकारले पनि केही मुख्य ट्रंक सडकहरू विस्तार गर्ने र नयाँ ठाउँसम्म सडक ट्र्याक खोल्ने कामलाई प्राथमिकता दिइएको वडा अध्यक्ष हरि न्यौपानेले जानकारी दिनुभयो ।
स्थानीय सरकारका अनुसार वडाको नियमित बजेट भने साना संरचनागत काममा केन्द्रित गरिएको छ। जस्तै, वडाभित्रका भित्री गल्लीमा ड्रेनेज निर्माण, सडक मर्मत, ग्रावेलिङ, र ट्र्याक खोल्ने कामहरू वडाको स्रोतबाटै सञ्चालित छन्। “हामीले संघ र प्रदेशलाई मुख्य सडक र ठूला योजना दिन आग्रह गरेका छौं, किनभने त्यहाँ ठूलो लगानी आवश्यक छ। वडाबाट भने स्थानीय स्तरका आवश्यकता पुरा गर्ने प्रयासमा छौं,” वडा अध्यक्ष न्यौपानेको भनाइ छ।
वडाबासी पनि हाल विकास योजनामा आएको तिव्रता देखेर उत्साहित देखिन्छन्। लामो समयदेखि उपेक्षित रहँदै आएको वडा नं १ अब क्रमशः योजना तथा बजेटका हिसाबले पनि अग्रसर बन्दै गएको महसुस हुन थालेको छ।
विकास योजनामा देखिएको यो नयाँ गति वडाको पूर्वाधार विकास र जनताको जीवनस्तर सुधारमा सकारात्मक प्रभाव पार्ने अपेक्षा गरिएको छ।
